Dal "Baron Litron" al "Tango delle capinere" na bela sèrnia për cantene un-a 'nsema.

"Si già tuti lo san, ch'i son n'artista,
con la manoja 'n man faso 'l pianista,
conòsso tut Turin cort e përtus,
e cerco 'd femla bin sonand a j'uss":

parèj a taca la canson dël "Sonador ambulant", un-a dle squasi dosent canson che Gian Enrico Ferraris a cheuj ant ël lìber "Canzoni recuperate" dont a l'é surtìe da pòch la sconda edission për la Graphot Editrice (Lungo Dora Colletta 113/10 bis, Turin, pag. 238, Euro 16).
Ël tìtol, a spiega l'autor a l'é nen butà lì a l'asar, ma as trata an tanti cas pròpe 'd canson ch'as treuvo bin da ràir, se nen d'autut, publicà. La stòria a ancamin-a parèj: un grup ëd përson-e a l'ha ancamin-à 'n pòch ëd temp fa a trovesse ant un cafè ant ël cheur dël Borgh dël fum e a scheuvre 'l piasì 'd canté 'nsema, a la bon-a sensa tròpe pretèise ... an amicissia.
Un di apress l'àutr ël grup a l'é consolidasse, a l'ha creasse un sò repertòri, a l'ha trovasse un nòm amusant: "Le vos grise 'n libertà".
Monsù Gian Enrico Ferraris che a l'é dla partìa dle vos grise, dòp avèj fàit un lìber sël "Borgh dël fum" (sempe da Graphot) e esse an tren ëd publichene un sël "Moschino che fu poi Vanchiglia", për arpatesse e arpatene noi, a l'ha butà ansema cost lìber ëd canson dle "vos grise" , con ij test, le tradussion, le notissie dj'autor, l'época, ij pòst doa as cantavo e a së scotavo, organisand ël tut an ses càpitoj bin turnì: 45 canson piemontèise (da Baron Litron a Giaco Tross dl'Isler, da La barchëtta 'd Broferi a La Funicolar ëd Superga, da A Turin a la Reusa Bianca a Sponta 'l sol); 16 canson d'àutre region (Ido gobeti, Calabrisella, tant për sitene doe); 17 canson da piòla (...); 17 canson dla protesta (...); 40 canson dla radio (...); 13 canson dij Café-chantant (...). Un travaj fiamengh ch'a veul esse 'dcò n'anvit a torna scheuvre la gòj 'd canté ansema. Canté a rend ël cheur content.

d'Albina Malerba - dal Vënner dLa Stampa dël 12 dë Stèmber 2003