Tante vos nostran-e 'd teatro e 'd poesìa dai doi sonèt d'Alfieri a Renzo Gandolfo.

St'agn sì l'apontament a l'é për lun-es 15 dë dzèmber a eut e mesa 'd sèira, al Teatro Carignan, la bombonera ch'a l'ha inaugurà ses agn fa la bela costuma dla vijà 'd Natal. Organisà da la Region (Assessorà a la Coltura) e da la Ca dë Studi Piemontèis, a l'é la sesta vijà che foma ansema. A l'é 'l sest Natal che le pì bele vos piemontèise a diso për noi 'l son dla speransa dël Bambin. E sicome la poesìa, pòch o tant, an cambia sempe, a l'é nen stàita n'ideja da gnente sërché n'ocasion për sté ansema e fesse traversé dai ragg che mach la poesìa a sa fé s-ciòde coma 'n sol an mes a le nebie pì spësse.
A l'é nen mach na question ëd sente le vos ëd Natal. A l'é question ëd trovesse a Natal për sente le vos piemontèise, cole pì nostran-e. Sensa esclude gnun, as trata ëd fesse pì visin a la tèra pì nòsta për sentisse òmo 'd tute part. E për fé sòn gnente 'd pì bel che mëssoné dai tanti autor ch'a l'han fàit bela la literatura piemontèisa: ij doi sonèt piemontèis d'Alfieri për ël Sètsent, Norberto Rosa (dosent agn da la nassita) për l'Eutsent e 'n bel pëssion dla bela époque, da Alarni a Rico, e anans con Costa, Gallina, Carlottina Rocco, Spaldo, Olivero, Barba Tòne.
Vos riche mincaun-a 'd na fòrsa fàita 'd nuanse manaman satìriche, lìriche, dramàtiche. E a propòsit ëd nuanse dramàtiche, a-i é 'dcò un bel pòst për ël teatro: doi intervent d'Onorato Castellino (1880-1952) e 'd Pinin Pacòt për la tùa e la valorisassion bin antivista dël teatro an piemontèis (nen un cas che ant l'ocasion dla vijà a ven-o premià, da l'assessor Giampiero Leo, Michele Bonavero e Sergio Arneodo për ij tèst dl'ultim concors teatral bandì da la Region). A lese a sarn j'ator soagnà da la regìa 'd Massimo Scaglione: Rosalba Bongiovanni, Mario Brusa, Aldo Delaude, Vittoria Lottero, Fulvia Roggero, Marco Voerzio, compagnà da la chitara 'd Mario Bricca e dal violin ëd Bruno Landi. Tanti passagi obligà për finì con "Natal" ëd Renzo Gandolfo.
Na promesa 'd lenga 'd poesìa për na caban-a 'd sentiment ch'a ven-o dal creus dij temp.


ëd Giovanni Tesio - dal Vënner dLa Stampa dël 12 dë Dzèmber 2003