A l'ansëgna dij Brandè tante pàgine da lese tut l'an e 'n pòch për mincadì.

Come un bochèt profumà 'd tèra nòsta, a l'é surtije, second na tradission ch'a dura da quarantesinch ani, "Ij Brandé. Armanach ëd poesìa piemontèisa" për ël 2004. Soagnà da Remo Bertodatti con la colaborassion d'Angelo Orlando, edission "A l'ansëgna dij Brandé", suplement al mensil "Piemontèis ancheuj" (pp. 158, euro 15). A s'ancamin-a con ël calendari piemontèis compagnà mèis për mèis da notissie e curiosità dë stòria piemontèisa, dai sant piemontèis, dai proverb e da la poesìa d'un dij nòsti autor dël passà: Alfonso Ferrero, Carlottina Rocco, Giulio Segre, Giovanni Gianotti, Antonio Bodrero, Pinin Pacòt, mach për nominene cheidun. Ma "Ij Brandé" a l'é n'armanach leterari, e gavasse 'l sagrin dël calendari, a smon, an pròsa e an poesìa, na bela antologìa dle vos ëd tut ël Piemont: mëssonoma dsà e dlà sitand Camillo Brero, Bianca Dorato, Giovanni Morello, Dario Pasero, Rico Gulin, Guido Musso, Aldo Barberis, Michele Bonavero për Turin e anviron; Giuseppe Tencaioli për ël Noarèis; Giòrs de montagù e Maria Pia Coda Forno për ël bielèis e via parèj. Tra j'artìcoj: 'd Tavo Burat, "Prinsipà an Resistensa", un "meisin" polìtich-aministrativ féodal, andipendent dai Savòia, ël Prinsipà 'd Massran; 'd Luciano Gibelli, "Le prime guide alpine", ij Maron che con le Ramasse (na sòrt ëd lesa) a compagnavo coj ch'a traversavo ij pass alpin quand a mancavo le stra; mentre Censin Pich a përcor "Ij trantani dl'Union ëd j'Associassion Piemontèise ant ël Mond". Presentà e sernù da Fransech Rubat Borel "Moment ëd nòsta stòria leteraria mëssonà an s'Ij Brandé Giornal ëd poesìa piemontèisa", ch'an propon la "Presentassion dl'Alion" d'Enzo Bottasso, un tòch sul "Cont Piolèt" d'Attilio Spaldo, vàire tòch ëd Pacòt, ëd Mottura e d'àutr ancora. Pòche sitassion për dì ch'as trata, sì, 'd na publicassion anual ch'a l'ha për tìtol la paròla Armanach ma che tutun a l'é un lìber con tante ròbe bele e curiose, bon a compagnene për tut l'ani. d'Albina Malerba - dal Vënner dLa Stampa dël 23 ëd Gené 2004

Indietro