Premià a Mondvì 'l lìber ëd Nicola Duberti. Poesìa d'un giovo ch'a përfuma tradission.

"Arvëdse, neh Tromlin, salutme 'l Moro!". A son ij vers ch'a saro na bela poesìa 'd Carlo Baretti (1886-1946) un dij poeta 'd Mondvì, che ansema a d'àutri, mach për dine n'àutr sò pare Eraldo Baretti, a fan ëd costa sità, e dël monregalèis an general, un dij pivò dla poesìa piemontèisa con na bela filera 'd poeta, che a cost'aria e 'd cost'ambra a son nutrisse, e che ancor ancheuj a san parlé a tut ël Piemont e 'dcò dëdlà dij finagj regionaj. Venta dì, për chi a l'ha mai visità Mondvì, che 'l Mòro a l'é 'l campanon sla gesia 'd San Pe a Breo: "... 'l Mòro ch'a sta la drenta a marché o temp sempre a la stessa mòda da quasi tersent agn." Ij vers ëd Baretti a arnòmo 'l concors ëd poesìa piemontèisa "Salutme 'l Mòro" che j'Amis ëd Piassa a organiso dal 1967. Dal 1982 'l Concors a premia un poeta ch'a vala, publicandje n'euvra. Parèj ancheuj i l'oma na colan-a con nòm come Barba Tòni, Tavo Burat, Carlo Regis, Remigio Bertolino, Barbafiòre, Bianca Dòrato (a son disdeut e a l'é malfé nomineje tuj). Ël premià 2003 a l'é un giovo monregalèis ëd Viola an Val Mongia, Nicola Duberti, con ël lìber "Ënvërtojé", presentà da Giovanni Tesio (Edission Ël Pèilo - Amici di Piazza, pp. 125). Le poesìe 'd Duberti a son neuve e antiche ant l'istess temp, poesìa giovo (e chiel al l'é: a l'é nà dël 1969) respirà a la tradission ëd soe part (Tesio a arciama n'"affinità" con Bertolino), con na cifra mach soa: 'n monregalèis s-ciass, vers ëd paròle-ròbe ch'a sgato drinta a j'arsàut pì stërmà 'd nòste emossion e a-j gelo e 'dcò a j'ansigo. A l'é coma se dòp un vers, un moviment, të spetèisse na paròla, n'imagine pì scontà, che Duberti a arnega për n'àutra ch'at lassa ne a l'arlass, ma a të sponcion-a. "Le còse në scoto. 'N bicer os peu pijesse 'n man e costrenzlo a sërvine da bèive. Fin tant che na matin, sensa rason, it lo treuvi dësblà 'nsima o tavo O l'é rotse da sol, ënt la neucc, ën silensi". Na poesìa ch'a serca ant ij fij mës-cià e stërmà dij di l'ombra nacia dla vrità dël vive. d'Albina Malerba - dal Vënner dLa Stampa dël 6 ëd Fërvé 2004

Indietro