Le pì economiose e le pì prest fàite ant un lìber dai batsoà al vin brulé.

"Ant un'época come la nòstra, andoa l'artefàit a ven sostituì ël genit, a diventa un dover col ëd dësvelé la vos particular che la natura a manifesta travers la creatività fantasiosa dla cusin-a popolar". Con coste paròle ch'a na son ël manifest e an diso 'l but dël travaj, as deurb ël bel volum dl' "Arsetari dla cusin-a piemontèisa", ch'an sot tìtol a pòrta: "le arsete pì economiose e pì prest fàite, sernùe, tastà e smonùe da Camillo Brero", publicà (edission V) da Piemonte in Bancarella. A peul smijé dròlo che un poeta as buta a scrive 'd cusin-a. Ma se 'ndoma mach a fiché 'l nas andrinta al lìber a l'é nen mal fé capì che Brero an conta j'arsete 'd nòsta tera ch'a l'han col savor ëd ca, 'd mama, 'd magna, 'd feu, d'eva, ch'a son tanti ingredient dla cusin-a ma 'dcò dla poesìa: a son 158 pagin-e, an na bela veste gràfica 'n pò liberty, doa i podoma lese squasi quatsent arsete scrite an piemontèis (con tradussion an italian) ch'a son coma ij vers d'un poemet ch'a l'é 'dcò stòria e nostalgìa 'd nòste ca. Gnanca a dilo as part da j'antipast: da j'ancioe al verd a la sofià 'd giambon; peui ij prim: agnolòt, mnestra marià, pasta real, panissa, 'l risòt ajà, vàire supe, doa la pì bon-a a l'é la supa mitonà (chi a la fa 'ncor). Për jë scond a j'é da perde la testa e fete vnì l'anvìa: ij batsoà, euv e tonn al verd, ij fricandò, la fricassà mista, e cola fritura dossa 'd Magna Pinòta che a mia ca i ciamoma 'd Magna Angiolina, fàita nen con la sëmola, ma con la farin-a bianca. Na fritura ch'a fa arsussité ij mòrt, chërdime; e che fin-a adess i j'era sicura ch'a fussa 'n segret mach ëd mia mama. E peui trìfule, tripa, tenche, scalopin-e, servelà, ran-e, rognon, sàutisse; galuparìe d'antan coma la bagna càuda o la sòma d'aj; e ancora bonèt, friceuj, fogasse, aperitiv e digestiv për finì con ël vin càud o vin brulé. Ses pagine veuide al fond për gionteje j' "Arson ëd Famija". Ma se pròpi i l'eve fam l'arseta pì fosonanta a l'é la "Marenda dij Bré": pan ciòrgn (dur), bagnà ant l'eva 'd fontan-a, condì con l'aptit. Bon pro! d'Albina Malerba - dal Vënner dLa Stampa dël 20 ëd Fërvé 2004

Indietro