Andrea Lanza a pùblica j'inédite 'd Sinigaglia. Stòrie tràgiche e dròle ch'a son la nòsta stòria.

A fa gòj saluté "La raccolta inedita di 104 canzoni popolari piemontesi" 'd Leone Sinigaglia che Andrea Lanza a l'ha cudì con bela competensa për l'editor torinèis Giancarlo Zedde (pp. 208, Euro 24). Na cujìa - coma dis Lanza con ëd rason pa mal - ch'a l'é pì original e amportanta ëd cola bin pì avosà dle "36 Vecchie Canzoni Popolari del Piemonte" publicà a Lipsia ant ël 1914-17 dal musicista e studios turinèis ch'a l'era anlevasse a le scòle d'Eusebius Mandiczewsky e d'Antonin Dvoràk. Da "La biondinetta" ("Ò bel bërgé ch'a va 'n montagna") a "La Lionetta" ("E la Lionòta l'era nël camp, l'era nël camp"), un lìber ch'a fa pro 'n bel servisse a tuti j'apassionà. Stòrie sèmpie e pien-e dël sens tràgich dla vita. Stòrie dròle e pien-e d'un ghëddo ch'a fa monté 'l gigèt. Stòrie mate ch'a conto 'd "monighete" pà tan bin intensionà e 'd "galant" ch'a deuvo paghé la sal pròpe përché a son un pò folitro. Stòrie 'd nosse viton-e e stòrie 'd soporture d'amor. Canson dle vijà e filastròcole dij contrare, coma a l'é cola bastansa conossùa 'd Michel Tross (che, lo diso tra parentesi, Pare Isler a l'é 'nventasse a soa manera con un tòni ch'a pija giusta l'andi da na bela tradission popolar): "Bon-a seira, Michel Tross, le ninsòle son pa nos. E le nos son pa ninsòle, e i messé son pa le nòre." A vince - coma disìa 'l Nigra - a son giusta le stòrie, le conte, le figure e ij përsonage ch'a ten-o la sena. Omo ch'a masso, dòne sassinà, fije garghe, sfojor ch'a serco, monie ch'a formiolo, molinere ch'a pioro, fomne 'd Savian, tambornin e rataplan. Tut un mond ch'a na mosta n'àut. A l'é dabon un divertiment butesse lì e lese e scoté le spiegassion che Lanza an dà con tanta precision. Gnente mal lassesse 'n pò 'ndé - chi a sà la mùsica - a canté sle nòte ch'a compagno le paròle. Le pì conossue? Forse cole famose da vin: "Da 'n tera an pianta, ò che bela pianta, pianta, pianton, piantin, col ciribibin ch'an pianta 'l vin, ò che bon vin di pianta!". Na canson alegra për fé festa a 'n lìber përparèj. Da nen strachesse a leslo (e a cantelo). ëd Giovanni Tesio - dal Vënner dLa Stampa dël 12 ëd Mars 2004

Indietro