Un bochèt ëd na sinquanten-a 'd canson soagnà da Ezio Girardi e Rita Giacomino.

A son un bochèt ëd na sinquanten-a 'd canson che a në smon Ezio Girardi, musicista, compositor e cantautor, ant un lìber pen-a surtì, soagnà da l'Associassion "Amici della Cultura Piemontese", con ël tìtol "Neuv cansonié piemontèis për vos e strument" (as peul trovesse a la Libreria Piemontèisa 'd via San Second e 'd via Garibaldi e da Piemonte in Bancarella 'd Cors Siccardi). Ezio Girardi (con la colaborassion ëd Rita Giacomino) a l'ha a sò ativ già vaire CD e costa neuva publicassion as buta an cola carsà. "Con cost lìber - a scriv l'autor ant la prefassion - i l'hai vorsù porté a conossensa dël pùblic na part dël repertòri 'd canson popolar, giontand aj motiv tradissionaj, d'àutre canson con ël but d'eufre neuve propòste, parèj da slarghé e arnové 'l patrimòni musical dël Piemont". Lòn ch'a l'é particolarment amportant an cost cansonié, a l'é ch'a buta an condission j'apassionà dla mùsica piemontèisa, d'esegue ij motiv con ël cant e con në strument, përché a pùblica nen mach le paròle, ma le partiture musicaj complete: a s'ancamin-a con ""A Turin a la reusa bianca" (chi a l'arcòrda nen?), as passa për l'"Assedi 'd Turin", peui "La Bergera fedele" (cola che tuti i conossoma coma "A l'ombreta d'un busson"), l'"Omnetin", "La marcia dël Prinsi Tomà", "La mia mama a veul che fila"; le poesìe musicà coma "Arsivòli" 'd Pinin Pacòt, "Piemont deuv vive" 'd Camillo Brero, "La camisin-a" 'd Nino Costa musicà da Luigi Perracchio; o ancora la balda 'd Maria Bricca, paròle e musica dl'istess Girardi, come "Piemonte Bluess"; e ancora mach la mùsica strumental për la "Corenta" o "Marianna", o "Valzer per lei". Tuti ij test dle canson a son compagnà da la tradussion an italian, da la melodìa për ël cant e j'arcòrdi për l'acompagnament. A së spera, a conclud l'autor, ëd dé un contribù al repertòri musical nòst ch'a l'é sempe stàit sonvalutà e ch'a merita d'avej na difusion motobin pì slargà. Un lìber ch'a l'é ansema në spartì, për giutene a sté alégher e canté an companìa. d'Albina Malerba - dal Vënner dla Stampa dël 2 d'Avril dël 2004

Indietro