Lenghìstica, literatura, poesìa, didàtica. Doe giornà 'd travaj për cudì nòste rèis.

Rëscontr antërnassional dë studi an sla lenga e la literatura piemontèisa ch'a fà vintun. A Ivreja, l'eut e 'l neuv ëd magg (Àula Magna dël Liceo Clàssich "C. Botta"), n'ancontr ch'a fà tradission. Da Alba a Quinsné, da Turin a Ivreja, ma la caden-a a s'arlama nen. Gianrens Clivio (diretor sientìfich) sempe a timoné, Censin Pich (decan inossidàbil) sempe a masenté. Organisà da la Companìa dij Brandé, da la Ca dë Studi Piemontèis, la l'Union Associassion Piemontèise ant ël Mond, da la Famija Turinèisa, da "La Slòira" e dal Liceo Clàssich e Lenghìstich Antërnassional "C. Botta", le doe giornà 'd travaj a contribuisso pa mal a j'ëstudi 'd nòste rèis e 'd nòsta coltura. Da ca e da lontan (New York, Toronto) studios ch'a parleran ëd question, come sempe, 'd gramàtica, 'd literatura, 'd poesìa àuta e popolar, 'd lenghìstica, 'd didàtica. Përché combin ch'a sio temp d'ecologìa dl'ambient e dla ment, s l'é nen na bagatlin-a fé capì che conòsse tut lò ch'a l'é lenga e coltura piemontèisa a l'é cudì un mond pì larg e pì giust. A dëstrue e a deturpé as fà 'n pressa. Ma peui i soma tùit pì pòver e pì ciòrgn. A la matin dl'eut, apress ël salut ëd Censin Pich, ancamin-o Lori Repetti ch'a parla 'd lò che 'l piemontèis a peul mosteje a la "morfofonologia" dl'italian e Sergi Garuss ch'a parla dël lissandrin. Dòp mesdì (a tre bòt) Sergi Gilardin a parla 'd Frusta, Giuliano Gasca Queirazza d'un test dël quatsent ant la parlada d'Àich, primo Culasso e Silvio Viberti 'd sò vocabolare d'Alba, Langhe e Roé e Giusep Gorìa 'd Barba Tòni Bodrìe. La duminica dla matin (a neuv ore) a saran Tavo Burat e Fransesch Rubat Borel a parlé, 'l prim ëd Pin ëd la Pitna, 'l second ëd substrat sèltich, e a tocrà a Gianrens Clivio funì con l'ecologìa dle lenghe e 'l piemontèis. Lë spassi a basta pen-a a dì l'indispensabil. L'anvit d'Ugo Cardinale e 'd Dario Pasé a l'é për tùit. Chi ch'a veul savèine 'd pì, basta telefoné al nùmer 011/562.25.12 ( ma a va 'dcò bin 0125/430.82), dësnò mandé 'n mesage 'd pòsta eletrònica (dario.pas@tiscalinet.it). ëd Giovanni tesio - dal Vënner dLa Stampa dël 7 ëd Magg dël 2004

Indietro