Profeta, sant, vësco, vos dal përfond ant ël bel lìber d'Annamaria Balossini.

A l'é passajne d'eva 'n Sesia da quand che Pinin Pacòt a l'é portasse a Noara për gropé a sò angage 'dcò coj poeta ch'a l'ero lontan da la capital dla Region. A-i é fin-a na data precisa, 18 ëd giugn dël 1960 (Pacòt a sarìa mancà quatr agn apress). Con chiel a-i era - për ij Brandé - Camillo Brero, Oreste Gallina, Giuseppe Lazzarone e a speteje a-i era 'l grup ëd coj ch'a son ciamasse i "Cinq da Noara": Sandro Bermani-Lisàndar (antlora sìndich dla sità), Dante Ticozzi, Luisa Falzoni, Malilla De Angelis, Giulio Carlo Genocchio. La poesìa novarèisa dij nòsti dì ancamin-a da lì. Ma peui - disìa - a l'é passajne d'eva sota ij pont e al dì d'ancheuj le còse a son cambià nen pòch. Pi gnun-e colonie da goerné, fiusa pien-a dla vos ch'a parla 'ndrinta con tuta la richessa dle diferense (a Noara 'l milanèis a fa soa part ma gnun-e tëmme për sossì, përché la poesìa a parla sempe doa e quand ch'a veul). A dimostré lò ch'a dovrìa nen avèj damanca d'esse dimostrà a basta dì dla poesìa 'd na poetëssa novarèisa, Annamaria Balossini, ch'a l'ha tajà curt con la tradission e ch'a scriv con forsa 'd novità. Sòn a veul dì che sò second lìber, "Cüi ch'i védan" (Archivio Capitolare, pag. 108, s.i.p.) a varda 'd pì a la poesìa 'd tuti temp che a cola local. Belessì a parlé a son ij profeta, ij sant, ij dotor e ij vësco ... ansoma, le statoe dla Basilica 'd San Gaudensi, cheur dla sità. A son cole che j'antich a ciamavo "prosopopee". Statoe ch'a parlo 'd salvëssa e 'd viage ('l viage 'd San Gaudensi pì che tut), ma statoe ch'a parlo da drinta, ch'a parlo na vos ch'a-j monta da na sorgiss bin përfonda e fonza, fin-a afrosa d'òte, ma pien-a 'd lus che sempe a bërlusa e a fà la gòj dlë spìrit. Annamaria Balossini a l'é chila ch'a parla la vos ëd coj ch'a parlo e coj ch'a parlo a parlo la vos ëd chila. A mi - lë spassi a l'é curt e le còse da dì tante - am pias dé 'l përfum d'un vers (darmage la grafìa nen unificà ...) dël pròfeta Oséa: "Trà fora 'l cör ch'l'é bèli biùtt, fal passà par al sidass, fagh fà 'n gir da suta 'l tòrc, cus l'è bon, cus l'è gram ... e 'nt al silensi at parlarò". ëd Giovanni Tesio - dal Vënner dla Stampa dël 21 ëd Magg dël 2004

Indietro