An piemontèis ma nen mach për ij piemontèis ël neuv giornal a varda mond e vita 'd tuti ij di.

Bele se ancheuj as sent un pòch ëd tut, an bon piemontèis l'afermativ a l'é "é", ch'as traduv: sì, oui, yes, e via parèj second an che lenga un a parla. E cost afermativ piemontèis "é!", a l'é 'l tìtol d'un neuv bimestral d'anformassion e coltura tut an lenga piemontèisa. Diretor responsabil a l'é Mauro Tosco, un professor dl'Università 'd Napoli, ma piemontèis ëd Cher; an redassion a-i é Gianni Davico e Silvio Sandrone. La redassion, andoa as peulo mandesse corispondensa e abonament (abonament për n'ani 15 euro fin-a al 30 ëd giugn; peui 18; un nùmer 3,5 euro), a l'é Piemontepress, via Guastalla 17, Turin, tel. 011/835262. A peul smié na ròba dròla che con tute le vos ch'a vëddo nen l'ora 'd soneje la passà a nòsta lenga, i sijo sì a dé la neuva (e costa a l'é na neuva për dabon!) che a l'é pen-a s-cioduje da la greuja n'arvista piemontèisa. A-i é da ciamesse se costi sì a son mat! Ma coj d'"é!" a son tut àutr che mat, a san lòn ch'as diso e a la canto sùbit ciàira fin-a da l'editorial: "é!" a l'é afermativ - a scrivo - "é!" a l'é positiv. "é!" a l'é piemontèis. "é!" a piora nen a pro dël piemontèis e dël Piemont. "é!" a chërd che i soma noi e mach noi, noiàutri piemontèis, j'ùnich responsàbij ëd la vita o dla mòrt ëd nòsta lenga. "é!" a giutrà tute le inissiative a pro dël piemontèis, ma avend ciàir che le lej regionaj e fin-a nassionaj a peulo nen e a podran mai pijé 'l pòst ëd lòn che i foma an nòsta vita, an nòste famije, an dovrand nòsta lenga, sensa gena e sensa por. An cost prim nùmer, as parla 'd "Monsù Chirac e la libertà 'd religion"; dë siensa, "L'ëspassi dij priva ant l'ëspasse"; 'd minoranse; 'd mùsica piemontèisa; d'art, "A venta sempe parlé bin dle piture moderne?", e 'd tante neuve dal mond ch'as treuvo non ant j'àutri giornaj. Rubriche fisse 'd "Question ëd lenga", "J'àutri piemontèis", për deje spassi a tute le variant locaj dël piemontèis e tant d'àutr. Ël nùmer 2 a surtrà 'l 1 ëd luj, e i sotsignoma lòn ch'a dis la publicità: "as ciama é! fevlo nen manché!". d'Albina Malerba - dal Vënner dla Stampa dël 28 ëd Magg 2004

Indietro