Na publicassion ëd Viglongo për memorielo con Brofferio, Costa e le patele dl'"Artaban".

L'oma già dilo, ma tornoma a dilo, përchè a basta mai. A son dosent agn da la mòrt d'Edoardo Calvo (1804-2004). N'aniversare amportant për un dij clàssich ëd nòsta literatura. Mèdich al San Gioann, pensador e giacobin, favolista sensa frange, òm da bin e umanitare, Calvo a l'é la radis ëd nòsta poesìa politica-moral. Tra le còse ch'a son fasse për l'ocasion aniversaria (tròp pòche për la vrità ma tra le pòche arcordoma che la Cà dë Studi a-j dedicrà a Calvo na session special ant ël second volum dl'arvista "Studi Piemontesi" ch'a surtirà a Natal) an fa piasì segnalé la publicassion ch'a l'han fàit seurte le edission ëd Giovanna e Franca Viglongo (pp. 112, euro 12). Pro bel arcordé che al moment dl'arnassita dij Brandé, a l'é con Calvo ch'a l'ha pijà l'ande -pròpe da Viglongo - 'l proget dle edission dij clàssich piemontèis. Pro bel arcordé che l'edission 'd "Tutte le poesìe piemontesi" dël Calvo, surtìa dël '30 e cudìa da Pinin Pacòt e Andrea Viglongo, a l'avìa l'introdussion ëd Costa. Nen inùtil dì che cola edission a recuperava già lë stude biogràfich dël Brofferio, ch'a l'é giusta la part pì susnosa 'd costa publicassion dël bisentenare. Con sò bel ghëddo dë scritura rich ëd trovaje, Giovanna Viglongo a deurv la carzà (a bastrìa, sì, l'emossion d'un nòm come Ughes, ch'a sàuta fòra da na litra dla Munisipalità 'd Turin për fé la gòj 'd chi a sa la siensa dl'arserca e dle crosiere ch'a gropo ij letor ëd tut un mond, dal Calvo giacobin al Caladra dla "Bufera" ...). Peui a-i ven la "Vita e Opere di Edoardo Calvo" d'Angelo Brofferio, "Il Poeta ed i suoi tempi" 'd Nino Costa e a la fin - con tante bele notassion ch'a giuto a lese mej - l'"assion tragico-còmico-buffo-filosòfico-pòetica o profetica" dl'"Artaban bastonà": la "comedia" ambientà "ant ël pais dij Mamaluch smamalucà" (tra piassa san Gioann e ij pòrti 'd Pò) doa ch'al médich Carlo Giulio (un dij tre "Carli" ch'a l'avijo consignà 'l Piemont aj Fransèis galup e scarnassos) a l'han faine na giaca da gaveje la veuja. Gnanca mal. ëd Giovanni Tesio - dal Vënner dla Stampa dël 4 ëd giugn dël 2004

Indietro