A l'é già bele pront ël Calendari Piemontèis ch'a seurt dal Punto-Piemonte in Bancarella.

As dis che 'l temp a l'é n'ideja, ma a cor coma na fusëtta e a l'é giumai l'ora 'd j'armanach për l'agn 2005. A smija prest, ma a l'é mai tròp prest. E donca a l'é parej che l'editris Il Punto-Piemonte in Bancarella a manda 'n gir ël sò tradissional Calendari Piemontèis "për le sità e ij sitadin" (për trovelo basta telefoné al nùmer 011/2238112). L'armanach a së s-ciama "La memòria dël temp" e a l'é n'armanach coma a podìa esse "Frate Indovino", con tuti ij sant e le madòne e le lun-e neuve e le lun-e pien-e e j'ùltim quart. Ma - a l'é pro vera - con un pò meno notissie bon-e për fé campagna e campagnin. Bele fòto 'd na vòta, un pò sepià, ch'a veul peui dì un pò giaunòte e ch'a fan tan "d'antan". A-i é l'"Équipe Temperino", ch'a l'ha fàit la legenda dle quat roe: màchine ch'andasìo a la velocità fosonanta dij sinquanta a l'ora. A-i é Piassa Vitòrio con ij tram a cavaj. A-i é Via dl'Arsenal, cheur dla "city", ròba d'afé e 'd finansa. A-i é na gita 'n montagna. A-i è la faciada dla farmacìa chimica Tullio Bosio, 'n Via Garibaldi. A-i é j'ovrié ch'a fan la pàusa 'd mesdì aj travaj 'd Via Roma arfàita neuva neuvissa. A-i é na piòla stòrica, La "Tampa Lirica". A-i é le maestranse dla Tratorìa dël Gasometro 'n via Camerana, a l'àngol ëd via Assieta. E a-i n'a j'é d'àutre 'ncora. Ma ansema a-i é dij bej scrit ch'a fan color: ëd Renzo Rossotti, Camillo Brero, Remo Bertodatti, Piero Bianucci, Piergiuseppe Menietti, Giuseppe Goria. Un a parla 'd sò tich tach vers l'agn ch'a ven, n'àutr dël sò bzogn ëd pas, n'àutr ancora 'd sò pais, ch'a l'é San Giòrs, ël pais dël Botta e 'd col galinàire 'd Giorgio Orsolano, "la jena 'd San Giòrs" (dont a l'ha contane Guido Ceronetti). Bianucci an parla 'd Francesco Faà di Bruno, Menietti dl'assedi dël 1706 e Goria dij viage dla prima metà dl'Eutsent tra Turin e le valade valdèise. Na bela compagnìa për l'agn ch'a sarà ant un nen lì a le pòrte. Na riga al dì për fé 'n pò 'd conossense. Curiosità 'd na vòta a giuto a vive. Per la memòria dël temp a l'é sempre 'l temp dla memòria. ëd Giovanni Tesio - dal Vënner dla Stampa dël 24 dë Stémber dël 2004

Indietro