Un libretin ëd filastròcole për le masnà tra lumasse e ratin, trin trin e bisin bisela.

A l'é pro bel andé con j'arcòrd a quand che pare e mare o nòna (o magara 'n barba) an disìa le cite filastròcole ch'an fasìo gòj. A l'ha dilo benissim Autelli ant ël sò lìber pì bel ch'a l'é "Pan 'd coa". Prima 'n pò 'd manfrin-a, giusta për fene pené e për fene amprende che nen tut as peul avèjsse sùbit, e peuj via fòrt con le ciribicòcole. Ancheuj a l'é divers përchè tut a cambia, ma la gòj dle masnà a dura. Sensa conté che ancheuj le filastròcole piemontèise as dòvro 'dcò për mosté, coma dimostra la cita cujìa ilustrà da le masnà dla scòla dl'infansia 'd Barge Capleu, coordinà da Monica Nicòt e publicà da Gioventura Piemontèisa (neuva sede, via San Secondo 7 bis). A l'é vnuje 'n libretin dësgagià ch'as les an des minute ma 'dcò an mesa giornà, basta che un a lo cudissa tochèt për tochèt, për nen fesne na stomiera tuta ansema. Ël librèt a s'ëntitola "Din Dalan" (pp. 48, s.i.p.) e a l'é già 'l prinsipi 'd cola ch'a fa: "Din Dalan l'é mortije 'l can can bocin ëd nòm Gioanin Gioanin cotel tajaje la pel la pel tajà campela ant ël pra ël pra a l'é pien d'urtije core core bele fije a ciapé Gioanin për j'orije". Ma a-i n'a-i é tante d'àutre ch'a fan part dël patrimòni 'd tute le infansie dël mond, coma "Lumassa" : (Lumassa lumasson tira fòra ij tò cornon che senò ciamo 'l barbé e it jë fon sùbit tajé), coma "Sàuta" : (Sàuta bilàuta na bela mica 'd pàuta na bela mica 'd ris sautoma an paradis), coma "Nana Naneta": (Nana naneta Mama l'é andàita a mëssa mëssa sonava l'àngel cantava cantava tanto bin fà la nana bel bambin). Filastròcole, contin-e, formolàire për le dësmore da fé ansema. Cola che Primo Levi a ciamava l'internassional dle masnà. Lò ch'a serv për scaudé la memoria dij grand, ma 'dcò për dì che la memoria a va cudìa e che ancaminé da le masnà a l'é mai tròp tòst. Tute le còse a sò temp e a soa manera. Le scòle dl'infansia a l'han ij sò temp e "Din Dalan" a l'é na bela manera. Sensa nojé. Sensa pretende. Con la fiusa 'd fé cheicosëtta për nen che la neuit a vincia la partija. ëd Giovanni Tesio - dal Vënner dla Stampa dël 22 d'otóber dël 2004

Indietro