L'iscrission ant un elench dla Region Piemont ch'a taja fòra chi a l'ha nen le carte 'n regola.

I lo soma. L'assessor a l'Identità a l'é n'òm ëd paròla e lò ch'a l'ha dit ch'a vorìa fé a l'é 'ncamin ch'a lo fa. Nen sempe a më smija ch'a fassa coma am piasrìa ch'a fèissa, ma peuss nen dì ch'a fassa nen e gnanca ch'a fassa nen dabin. Pijoma la costion dij cors ëd piemontèis, che fin-a ancheuj a son fasse a la bon-a (a veul nen dì malament) e a son stàit soens gropà a la bon-a volontà 'd cheidun (penso a tuta l'atività 'd Camillo Brero, ch'a l'é stàit ël pì pront e antivist), òpurament dle Associassion ch'a son chërsue a costa consigna, come la Companìa dij Brandé, Nòste Rèis, Gioventura Piemontèisa, la Ca dë Studi Piemontèis (ma podrìo sitene d'àutre 'ncora ch'a travajo 'n provincia). A l'han fàit tuti ij sò sfòrs për fé 'n manera che 'l piemontèis a resista e a dura, a dispet ëd tute le ciòche ch'a-j son-o la passà. Ma adess a smijrìa ch'as fassa pì seriament. Adess tuti coj ch'a veulo dedichesse a mostré 'l piemontèis ant le scòle a deuvo esse iscrit ant un elench regional, a deuvo fé na domanda a la Region Piemont (Diression Promossion Atività Culturaj, Istrussion e Spetàcol, via Meucci 31) prima dël 31 dë dzémber 2004 (për savejne 'd pì basta telefoné ai nùmer 011/432.40.72) òpurament 011/432.49.55), a dovran avèj ij papé 'n régola con tant ëd diplòma specìfich, d'abilitassion, ëd laurea, a-i sarà na comission ch'a-j giudica. Pì gnente da fé për chi ch'a l'é fasse daspërchièl, studiand, frequentand, butandje 'n pò 'd diligensa e 'n pò 'd passion? As dirìa pròpe ch'a sia parèj e sòn un pòch am dëspias. A sarìa dovusse prevëdde ant costa prima sèrnia 'n canal meno fiscal. Mi - e lo diso a tìtol përsonal - i l'hai por ëd régole tròp strèite ant un-a materia ch'a l'ha damanca 'd tùit. Vurrìa mai che a fòrsa 'd fé sul serio ant un sens istitussional as finijssa për mortifiché la veuja 'd fé d'ognidun. Për carità, lòn ch'as fà për fé pì da bin a va bin, ma tropi papé a fan na përzon e mi i l'avrìa pì car che 'l piemontèis a fùissa lìber e a goernèissa tut lòn ch'a l'é fasse. ëd Giovanni Tesio - dal Vënner dla Stampa dël 19 ëd novémber dël 2004

Indietro