La fòrsa d'esempi d'un poeta da Nobel për l'arnassita dla poesìa piemontèisa.

As deurb con ij vers ëd Nino Costa ("... e 'dcò la granda poesìa severaa ch'a l'ha cantà Mirèio e Calendàua libera coma 'l vent sël pian dla Cràua për gnun pais dël mond l'é forostera")a l'anvit e l'ancontr dë Studi "Mistral e il Felibrige. Un valore d'esempio per il Piemontese e per le minoranze linguistiche" che la Provincia 'd Turin e la Ca dë Studi Piemontèis a l'ha organizà për mercol 15 dë dzèmber, a Turin, a parte da quatr ore dë dòp disné, ant l'aula dël Consèj Provincial, an piassa Castel 205, ant l'ani dël sentenari dl'assegnassion dël Premi Nobel a Frédéric Mistral (Mallaine 1830-1914), 'l poeta dl'arnassita dla poesia, dla lenga e dla coltura dla Provensa. Për saré l'ani mistralian, ch'a l'ha vist vàire inissiative, e riflette, con j'euj duvert vers la speransa dl'avnì, sël valor d'esempi che 'l moviment dël "Felibrige" 'd Mistral (fondà sentesinquant'ani fa, dël 1854, a Font Ségigne, ant j'anviron d'Avignon), a l'ha avù sël piemontèis con "Ij brandé" ëd Pinin Pacòt e spantiasse peui ant le vaj alpin-e con l'"Escolo dòu Po" (a parte dal 1961) che dai Brandé a l'ha pijà vos, a presenteran relassion, dòp ij salut dl'Assesor a la Coltura dla Provincia, Valter Giuliano, Pierre Fabre, "Capoulié dou Felibrige", XIIIem sucessor ëd Mistral, ch'a parlerà 'd "Mistral en Héritage"; Tavo Burat dla Compania dij Brandé, "Sulle orme di Mistral: Pinin Pacòt, Ij Brandé, l'Escolo dou Po"; Dario Pasero, dl'arvista "La Slòira", "Mistral, il provenzale e il piemontese nella continuità di oggi"; che a scriv con na nòta sl'omagi che ij poeta piemontèis a l'han tributà a Mistral dël 1930, sentenari dla nassita dël poeta; Piero Cazzola, President dël Centro Interuniversitario di Ricerche sul Viaggio in Italia, "Il Viaggio in Italia di Mistral"; Giuliano Gasca Queirazza con na soa testimoniansa. A sara ij travaj Patrizia Picchi dla Provincia. A introduv e a modera Giovanni Tesio, dl'Università 'd Versèj. A la manifestassion a l'ha dàit soa tùa 'l "Felibrige" a l'ansëgna dla memòria dël "1854 - cent sinquantenàri - 2004". d'Albina Malerba - dal Vënner dla Stampa dël 10 dë dzèmber dël 2004

Indietro