Na neuva edission con ël manoscrit original për andé a le radis romanze dël piemontèis

Soagnà dal Consèj Regional dël Piemont e da la Ca dë Studi Piemontèis a l'é surtìe n'euvra soasìa ch'a fa onor al Piemont. A l'é l'edission completa dij "Sermon Subalpin" (pp. 350, presentà ant un elegant cofanèt; për anformassion tel. 011/53.74.86), un manoscrit dij pì antich, goernà ant la Biblioteca Nazionale Universitaria 'd Turin, che për un boneur ch'a l'ha fin-a dël miracolos a l'é salvasse dal feu che sent'ani fa (1904) a l'ha fàit un ravagi doloros a la Biblioteca. Ij "Sermon", vintedoe prediche dla fin dël Mila e sent, che son un "documento insigne di lingua e di civiltà", coma a scriv Gianrenzo P. Clivio ant ël "Profilo storico della letteratura in piemontese", a son stàit studià ant tut ël mond pròpi për l'importansa lenghìstica 'd na "raccolta, che non ha riscontro per la sua ampiezza nelle documentazioni coeve di altri volgari nostrani". I podrìo dì, con na paròla moderna, che ij "Sermon Subalpin" a son ël DNA dla lenga e dla literatura piemontèisa. L'edission ch'a seurt adess as presenta an tre ante e as segnala përchè a l'é la prima vòlta che a ven-o propòst an version ëntegral an lenga italian-a corenta, për man ëd Silvana Delfuoco e Piergiuseppe Bernardi, lòn ch'an giuta a capì tut ël valor spiritual ch'a l'avìo fin da la neuit dij temp e che ancor ancheuj a san comuniché. Peui la trascrission dël test original arpassà an manera pistin-a dal professor Giuliano Gasca Queirazza, che dij Sermon a l'ha proponù për prim n'ipotesi motobin amportanta për trovene 'l leu 'd produssion. A completé l'euvra, la riprodussion a color, a scala un a un, dël manoscrit original (con na nòta 'd Maria Letizia Sebastiani che a l'é la responsabila dl'Ufissi manoscrit e ràir dla Bliblioteca Nassional), ch'an fa cadò 'd tut l'ancantament cromàtich dla pergamena d'antan. Con costa inissiativa 'l Consèj Regional a l'ha vorsù buté a disposission ëd tuti 'l papé "delle origini della lingua piemontese", coma a fortìs ël President dël Consèj Regional, Roberto Cota, ant soa pagina d'overtura. d'Albina Malerba - dal Vënner dla Stampa dël 24 dë dzèmber dël 2004

Indietro