Con l'Agenda Piemontèisa për ël 2005 doi lìber ch'an compagno për tut l'agn

A-i é na gòj ant le tradission ch'as goerno e ch'a s'arneuvo: për sòn a l'é sempe na bon-a neuva quand pontual al finì dl'an e a l'anandiesse 'd col ch'a-i ven apress, an riva "Ij Brandé. Armanach ëd poesìa piemontèisa" che con cost 2005 a fa 46 ani ch'a seurt, dal prim vorsù e cudì da Pinin Pacòt, peui dòp soa mòrt da Renzo Gandolfo, n'ardità cuija da Camillo Brero e adess soagnà da Remo Bertodatti, "A l'Ansëgna dij Brandé", coma suplement anual ëd "Piemontèis Ancheuj", 'l mensil dël Centro Studi don Minzoni (stra 'd Seto 92, tel. e fax 011/274.14.47). Arnové conservand. A l'é costa la grifa dl'Armanach Literari che st'an a l'é "anzolivà" da le gravure 'd Tino Aime, ch'a scandisso an manera motobin grassiosa le diverse part dël volum: 140 pàgine s-ciasse 'd notissie, 'd proverbi, 'd prose, 'd poesìe, dë studi. A s'ancamin-a con ël Calendari piemontèis 2005, con ij segn dël zodìo, ël proverbi dël mèis, cite stòrie dël mèis contà da Luciano Gibelli e 'dcò la poesìa dël mèis. Peui la session "Nòte, arcòrd, arserche" con Censin Pich ch'a arcòrda le Feste dël Piemont; Giusep Goria ch'a presenta na pièce inédita 'd Giovanni Bono; Dario Pasero "Na comedia an piemontèis 'd Felice Giordan-a"; 'd Michel dij Bonavé "Teatro d'ancheuj"; 'd Valerio Rollone 'n "Dissionari campagnin ëd la parlada Livornin-a (Livorno Ferraris)". Ant ël cheur dl'Armanach na soasìa "Antologia 'd poesìa e pròsa d'ancheuj", con pì 'd quaranta autor, da Camillo Brero a Tavo Burat, Carlo Dardanello, don Michele Fusé, Maria Pia Coda Forno, Rita Giacomino e tanti d'àutri. Për saré, ij travaj dij cit dle scòle. Dacant a l'"Armanach", a duvrìa nen manché ant le ca dij piemontèis l'"Agenda Piemontèisa 2005", soagnà da Giusep Goria, con ij disegn ëd Mario Pich e 'd Franchin Gonela (Editris Il Punto - Piemonte in Bancarella). Bela, a fa 'l servissi 'd tute j'agende, ma an compagna con na sernìa 'd test dij grand dël passà e d'ancheuj: l'agenda leteraria dël Piemont. d'Albina Malerba - dal Vënner dla Stampa dël 21 ëd gené dël 2005

Indietro