Da Turin a Roma passand për nòste province ij cors organisà da la Region e da Ca de Studi

A s'ancamin-a da Turin, lùn-es 21 ëd fërvè a sinch ore dël dòp disné, con na lession su «I poeti della bela companìa dei Brande», për deur­be a roa, un-a apress l'àutra tute le vintedoi sede dij Cors «Piemontèis d'amprende. Leggerlo, scriverlo, parlarlo», che da eut ani la Ca de Studi Piemon­tèis a organisa për la Region Piemont, ant lë spirit dla Lej n. 26 del 1990 ch'a l'ha 'l but dla tua e dla valorisassion dl'original patrimòni lenghìstich dël Piemont. Da Turin, a Mondvì, da Ivrèja a Noara, a Carmagnòla, a Savian, Varal, Casal, Alba, Susa, Salusse e via fòrt, për quatsent ore 'd lession, con na tranten-a 'd docent da Giuliano Gasca Queirazza, ch'a farà an tute le sede n'ancontr sij cognòm piemontèis, a Tavo Burat, Angelo Agazzani, Pino Perrone, Giusep Gorìa, da Massimo Scaglione, ch'a fa lession dë stòria dël teatro, a Censin Pich, Dario Pasero, Michele Bonavero, Sergio Gilardino a Giovanni Tesio ch'a l'è 'dcò 'l Diretor dij Cors. Novità dë st'an 'l Cors ch'as farà ant la sede dla Region a Roma, dòp l'esperiensa pilòta dël 2004, ansema a l'Associassion dij Piemontèis a Roma. Tuti ij cors a saran ed neuv ancontr, sinch ch'a serviran pròpi a amprende a scrive 'l piemontèis e soe variante locaj, e quat ëd leteratura, teatro, canson popolar, lenghìstica. Ij pòst a son: a Turin, mersì a la colaborassion con le Biblioteche Civiche Torinesi, a la Biblioteca «A. Geisser», cors Casal 5; a Moncalé a la Famija Moncalerèisa, via Alfieri 40; a Susa a l'Unitre, cors Union Sovietica 18; a Ivrèja a l'Istituto d'Istrussion Superior «G. Cena» an via Dora Baltea 3; a Pinareul al Museo del Mutuo Soccorso, via Silvio Pellico 19; a Carmagnòla a la Biblioteca Cìvica, via Valobra 102. Sòn për lòn ch'a riguarda la Provincia 'd Turin. Per tute j'àutre sede a basta dé na telefonà al nùmer 011/53.74.86 (pòsta eletrònica: cspiem@libero.it) per savèj ij programa complet, ij pòst, ij di e tute le anformassion ch'a peulo anteressé për iscrivse. A la fin dël Cors tuti j'iscrit a ricevran n'atestà 'd frequensa. E anlora tacoma! d'Albina Malerba - dal Vënner dla Stampa dël 18 ëd fërvé dël 2005

Indietro