Tòrcia, fiama, flambò, sava, sust, cotura, terò. Tante paròle cite për n'arserca pien-a 'd giuss

Dòp tre ani 'd travaj, ch'a l'han vist angagià con le magistre e con la Redassion dël giornalin "LiberiTutt!" (mensil scrivù e lesù dai cit ch'as pùblica a Lissandria, via Palermo 7, tel. 0131/261230; fax 0131/317504; e-mail: mediacomal@libero.it) 150 scòle dël teritòri regional e la partecipassion d'8.000 cit, a seurt an volum ël "Dizionario in lingua piemontese per bambini" publicà an colaborassion con la Region Piemont (Settore promozione patrimonio culturale e linguistico) e le associassion Nòste Rèis, Unione per le Lingue delle Alpi Occidentali e la Ca dë Studi Piemontèis. A son 130 pagine a color scrite e disegnà dai cit për ij cit da la "a" a la zeta. Le paròle a son an italian, con un-a o pì corispondense an piemontèis e ant le variante dij diverse pòst. Për "agnello" ad esempi ij cit an dan le forme piemontèise "agnel", "bèro", "babèro", "bërro"; për "albicocca" i trovoma "armognan" e "arbicòch"; l'arcobaleno a l'ha le forme "arcansiel" e "cabalestra". I trovoma la paròla "cowboy" con an piemontèis "vaché", "boé", "marghé"; la "fiaccola" a l'è a seconda dle situassion e dij pòst "flambò", "tòrcia", "fiama" e "lum"; mentre l'"humus" a l'è "terò", "cotura", "giuss", "sava".. Na bela lession për tuti noi ch'is perdoma an tanti bla, bla, bla, dëscussion, distinsion, por, gene sensa cavion e rason. Lor ij cit a fan e an mostro la stra. Ogni paròla a l'ha sò bel disegn ch'an argala con l'arciam a 'n mond masnà, con tanti color e tanta gòj 'd vita.. Cost dissionari a l'é la pì bela preuva provà che ij proget për ël piemontèis ant le scòle a son nen na ròba vèja da fé grigné ij givo, ma a l'han la possibilità 'd fé amusé ij cit mentre ch'amprendo paròle neuve e ant él passagi da na lenga a l'àutra, butand a confront le diverse forme ch'a-i son për dì na ròba, a scheuvro 'l mond d'antorn e col pì lontan, a treuvo le paròle për ciamé le ròbe për feje esiste, për vorèije bin. A-i va 'n magistre antiviste e ij cit a mancheran nen ëd rësponde e 'd dene 'd bele lession. d'Albina Malerba - dal Vënner dla Stampa dël 1 d'Avril dël 2005

Indietro