Costantino Nigra e soe tre cantarin-e ant un lìber da lese, da sente, da soné

Ambassador, òm polìtich, poeta e scritor, Costantino Nigra a l'ha lassane un dij monument dël nòst patrimòni tradissìonal, con lë studi, la racòlta e la publicassion, ant ël 1888, dij "Canti Popolari del Piemonte"; 153 cant con le variante dij pòst, le comparassion nassionaj e internassionaj. Ma le melodie ch'a l'ha podù trascrive a son staite, darmage, mach sëddes. A coste melodìe, che Nigra a l'avìa podù sente e trascrive ai sò temp, a l'é dedicà 'l lìber ëd Rita Giacomino e Ezio Girardi, "Le melodie dei canti popolari del Piemonte di Costantino Nigra" (edission soagnà da l'Associassion "Amici della Cultura Piemontese" ëd Pianëssa, con ilustrassion d'Emanuela Girardi; as peul trovesse a la Libreria Piemontèisa 'd via San Second a Turin). A s'ancamin-a con na biografìa dël Nigra e na nòta, anteressanta, su "Le cantatrici di Costantino Nigra", con precise notissie biogràfiche an particolar su le tre che pì a l'han colaborà con chiel, visadì Teresa Croce (1883-1901) 'd Locan-a, che al Nigra a l'ha detà e cantà 39 canson; Domenica Bracco (1789-1865) 'd Sale Castelneuv, ch'a l'ha arferijne 26, e Teresa Berlino (1833-1868) 'd Cintan, "anformatris", coma as dirìa ancheuj, ed 17 canson. Peui 'l lìber a pùblica ij test ëd 15 canson (an grafìa normalisà, con tradussion an italian a fianch e na cita nòta stòrica): da "Donna Lombarda", a "La Pesca dell'Anello", da "II tamburin (Son tre tamborn ch'a ven-o da la guèra...) a "L'uccellino del bosco" (Bel oselin dël bòsch,/ për la campagna a vola..), da "Il pellegrino di Roma" a "Baron Litron" a "Carolina di Savoja" (La bela Carolin la veulo/ maridé...). Për conòsse mèj coste canson al lìber a l'é alegà un CD con le quindes canson (arangiament d'Ezio Girardi, che a canta 'dcò con Silvia Scianca). Un travaj ch'an restituiss, an sla pagina scrita e an mùsica un repertòri popolar ch'a l'ha radis profonde an nòsta tradission pì antica, ch'a peulo parèj - comascriv l'assessor Valter Giuliano ant la presentassion - artorné a neuva vita. d'Albina Malerba - dal Vënner dla Stampa dël 27 ëd magg dël 2005

Indietro