Tuta na religion ëd creature dël passà a viv ant un monfrin robust ëd poesìa

A l'é nen neuv a la poesìa, Teresio Malpassuto. Nen neuv përchè 'd poesìa a l'é ocupasne: d'àutri e soa (a bastrìa arcordé l'atension ch'a l'ha daje a "l'avocat dël Borgh" Piero Ravasenga, un poeta s'a-i n'a-i é un). Pà necessare che la poesìa a sia 'n vers. La poesìa s'a-i é a respira daspërtut. Tutun, adess, ël conossitor fin dle tradission monfrin-e, lë scritor ëd na bela guida dël Monfrà, l'inventor dël calendare "Casà 'd na vòta" a l'ha butà 'nsema soe poesìe ant un lìber neuv ch'a s'antìtola "Nivuli" (pp. 108, s.i.p.) e ch'a l'é publicà ant un-a colan-a ch'a l'é chiel midem a dirige (për ciamelo basta fé 'l nùmer 0142/78.16.32). Ël tìtol a l'é 'd coj largh, ch'a smijo fàit për arcordé tuta na filonghera 'd poeta ch'a l'han fane na bela sinfonìa pien-a 'd variassion). Ambelessì a l'é tut dit an pòche nòte ch'a fan pen-a na cita coa scrita coma 'n fià: "Sij stac/ cme 'l nivuli ch'ai pasu/ e ai van/ sensa lasé/ niùn-a marca/ an cìel" (bin intèis, rìspetoma la grafìa original, combin che belessì a-i sia gnun-e rason specifiche për deroghé da cola normalisà). Malpassuto a l'é 'n poeta ch'a sa dì coma se a le paròle a-j restèissa tacà cheicòs dla còsa ch'a diso: na concretëssa lingera, scrita squasi a matita, ma rudia e robusta, ch'a lassa na bela marca. Dividù 'n doe part, përsonalment am pias ëd pì la sconda (meno lìrica e pì narativa dla prima), përché ch'a esprim tut un mond d'ora d'antan, ch'a fan comun-a e siviltà. A sarìa fin-a tròp fàcil fé 'l nòm ed Buronzo për costa part sì (e Gianni Abbate ant la prefassion a na parla). Ma Malpassuto a riess a fé dle soe creature na còsa personal, sensa tròp dipende. A-i n'a-i é 'd dròle e 'd mate, a-i n'a-i é 'd baravantan-e e d'antërtojà. Ma tute a son butà lì coma ant un presepio dla memòria për gropene al sentiment dij mòrt ch'a vivo 'n noi. Se nòsta vita a l'è ampastà 'd mòrt, se noi soma fàit ëd coj ch'a-i son pì nen, përchè stupisse dël Cech e dël Paulinet, ëd "Diu Canonich" e dla "Lina dal Böc"? La caden-a 'd poesìa a l'é caden-a 'd pietà. A l'é sempe religion e fòrsa 'd vita. ëd Giovanni Tesio - dal Vënner dla Stampa dël dël 3 ëd giugn dël 2005

Indietro