Dal Cit Prinsi a 'n travaj 'd prima mignin doi lìber për ten-e 'n piòta 'l piemontèis

Ij giornaj a l'han dàit notissia che l'Unesco, ant lë scond "Atlante delle lingue del mondo a rischio estinzione", a buta 'n vardia sle mnasse ch'a grevo sël Piemontèis, e 'dcò sël Lombard, sël Ligur e sël Romagneul. A smija ch'a sìo tremila le lenghe ch'a stan për lassé për sempe costa tèra. Per lòn ch'a riguarda nòsta ca a venta che 'l travaj ch'a l'é ancaminasse vàire ani fa, mersì a na lege regional, a ven-a nen sganfà vìa, perché dabon a ancamin-o a sentisse d'arsultà. Për la tùa e la valorisassion, e a së spera për la salvëssa, a l'han bon pòst ij lìber e anlora, pròpi an broa dl'istà, i na segnalo doi, an manera che ant la valis dle vacanse, ansema a tanti àutri lìber gròss e amportant magara chijdun as na fica 'dcò un an piemontèis. Partoma da un lìber per ij cit (lor a son l'avnì dle lenghe): "A pansa mòla. Lìber ëd travaj an lenga piemontèisa per la scòla primaria", 'd Valter Bergesio e Paola Costa, con la colaborassion ëd Dario Pasé, Michela Gròss, David Damilan, Fransesch Rubat Borel (edission Nòste Rèis, piassa Savòja, 2/d; info@nostereis.org; pp.78, con tanti disegn colorà). Un lìber nassù sël camp, da 'd lession fàite 'nt na bela scòla dla pian-a 'd Coni, "andoa - a scrivo j'autor - ël piemontèis a l'è ancor viv e, travers le masnà, 'dcò ij pare e mare a l'n partessipà an manera viva... I speroma che, an intrand ant le scòle, la gent a peussa taché a parlé con orgheuj e sensa distinsion ël piemontèis (o qualsëssìa lenga natural), l'italian e le lenghe forestere". E sòn a sarìa franch na bela ròba e a giutrìa dabon tant. E peui un clàssich, pen-a torna an librerìa: "Ël cit Prinsi", edission an lenga piemontèisa d3a ciadeuvra d'Antoine De Saint-Exupéry, sconda edission con na neuva virà da l'original fransèis, soagnà da Adriana Chiabrando për le edission Gioventura Piemontèisa-Editrice Il Punto-Piemonte in Bancarella (editriceilpunto@tiscalinet.it; opura giovpiem@yahoo.it. contrà 'd San Second 7 bis, Turin), con j'aquarele dl'autor, conform a la prima edission merican-a dël 1943 (pp.95, euro 9,80). d'Albina Malerba - dal Vënner dla Stampa dël 24 ëd giugn dël 2005

Indietro