Un trovador ëd Turin e na madona dël Dosent ant un lìber antërsà 'd lenghe,

Na bela botega editorial cola ch'a l'ha butà su Gioventura Piemontèisa. Lìber pì che tut për le masnà. Lìber ch'a servo për fé amprende '1 piemontèis, për anandiene la neuva conossensa e arcaussene cola già anandià (tut a fa bon giust s'a-i è 'd bon sust). I disìo na botega editorial për le masnà, ma nen mach. A l'è na preuva 'l lìber ch'i l'hai sota j'euj e che l'hai finì 'd lese pròpi an cost moment. 'L lìber (ël libret, pà 'd còse gròsse) a s'antitola "Nicolet ëd Turin e Alasia 'd Viadan-a", a l'ha scrivulo Ricard-René Grazzi e a l'ha giusta publicalo Gioventura Piemontèisa {pp. 88, euro 9,80: për sërchelo basta passé ant la sede 'd Gioventura, contrà 'd San Second 7 bis). Grazzi a l'è 'n turinèis ch'a fa scòla a Turin, ch'a l'ha 'n fil ch'a lo gropa al Cremonèis (e sòn a spiega na frisa ch'a l'abia sernù 'd parlé d'un moment ch'a gropa a soa vota 'n pòst coma Viadan-a e n'àut coma Turin); un turinèis 'd sinquant'agn (a esse precis ed sinquantun) ch'a l'ha scrivù d'àutri lìber, che tanti d'àutri a n'ha 'nt ij cassiòt e che 'nsema con Majolin Galin-a e Giovana Gribàud a vira 'n piemontèis da na partija d'agn la Bibia. Ma sì a l'ha sernù n'argoment gnente mal, ch'a cobia la curiosità dl'arserca con un temp che a Turin e al Piemont a l'ha daje quàich sodisfassion. Ant un temp come col dij trovador, na stòria tra 'l trovador "maloreus" Nicolet ëd Turin e na "maloreusa" madona dël Dosent, Alasia 'd Viadan-a, prima fomna 'd Cavacabò dij Cavalcabò. Na marcia motobin antërsà e fin-a angavignà che Grazzi a dësdavan-a con bela grassia an quat lenghe diverse: 'l piemontèis dl'introdussion, el provensal dij test poétich, l'ìtalian dla gionta final, ch'a cheuj 'd pagine stòriche e critiche dë studios (Torraca e Bertoni per dì ij pì avosà) ch'a son ocupasse dlia costion e per bin livrà na paginòta 'd latin ch'a fa bela gòj. Quat lenghe amise e vsin-e, mare e seure 'd na siviltà che la stòria 'd Nicolet e 'd madona Alasia an fa cognësse 'n pò mej, 'n pò pì 'n creus. ëd Giovanni Tesio - dal Vënner dla Stampa dël 1 ëd luj dël 2005

Indietro