L'autor dla bela «Gramàtica Astësan-a» viagiand la drera anciarmanta dl'etern

ËL 28 agost l'è mancà Carlin Muss l'autor dla Gramàtica Astësan-a e poeta an piemontèis. Luciano Ravizza 'd Castealfé a l'ha ciamane 'd ricordelo ansima a Torino Sette con un sò scrit, ant soa parlada, còsa ch'i foma volentée e con tanta partecipassion: «Mè a sòn restà 'nbajà quand l'amis Carlin Muss ha dami na còpia 'd sò travaj; a gramatica Astèsan-a. A l'era na vita che chial as dedicava a l'arserca 'd paròli pì dròli, 'd dòcomenté a stòria 'd costa nòstra manera 'd parlé. L'astësan adzà da Tani, che a l'é una dël parladi pù fosonanti, cola che a comprend i comun d'Ast (nen a sità), Castealfé, Monciar, Cortansi, Baudiché. Cost triàngol Carlin ha studialo e ògni paròla a l'ha smontala fala a tòch, për peu armontela e fé rinassi col parlé di nòcc vegg. J'ùltim des agn ëd vita Carlin Muss ha dedicaji a l'Astësan pirchè a morijsa nan cola sò parlada, cola che cial o ciama a vos ëd mè mari! E mè che Carlin a l'heu conzilo pròpi ban a peuss divi che o so Astësan ha slongaji a vita! S'arserca si stu­di, a j'han facc un miracol, e fin quand s'euvra a l'era nan com­pleta chial dël timor che a-i chersiva 'ndan a l'é mai preocopassi, chial o doviva finì is travaj. A dimostrassiòn pì ciara a l'é cola che chial doi agn fa o scriviva na poesìa: «La vita sbëfiarda m'arlegra / dël pì argalante arcompense / da pì ch'am rosia 's timor; / an càpita ël còse pì bèle / da squasi doi agn a sta part: / Nossgnor l'ha gavami o dolor, / l'ha dama la grassia 'd soride / an facia al gram mé destin./ La mòrt l'ha bitassi a bavera: / a ghigna e gentila m'anvida / sla drera anciarmanta dl'etern». Costi paròli dimostro ël caràter ëd Car­lin Muss, e come chial as sentijsa quand a l'era tut andafara për bité ansema a sò gramàtica. Ma quand a l'ha finì cost sò travaj a l'é arlassasi, e pròpi ant col momant Catlin-a a l'ha tor­na fassi voghi. A compagné Carlin a j'era tanta gent, tanta che an sa frassion d'Ast a j'avo maj vist». Na testimoniansa ch'i sot-scrivoma, giontandje nòst argret për la mòrt d'un pìemontèis galantòm. d'Albina Malerba - dal Vënner dla Stampa dël 14 d'otóber dël 2005

Indietro