Silabare për amprende a lese e conté pen-a surtì da la botega 'd Gioventura

Citin citin, bisin bisin, mignin mignin ël piemontèis a fa ij sò pass (passin passèt) ant lë scòle cite, cole - miraco - ch'a son sò avnì. E alora a-i-é 'd bele bòite duverte pròpe për sòn ch'a forgio d'euvre pien-e 'd sust e 'd ghëddo, pensà për le masnà e për tuti coj ch'a l'han piasì d'anciarmesse al bel deuit. J'ùltime creature surtije da un-a 'd coste bòite pì ative (sò nòm a l'è "Gioventura Piemontèisa") a son doi lìber ch'a fan part dël proget "Arbut" nà ondes agn fa "per concore a goerné e promeuve l'identità 'd nòstr Pais an manera moderna, dinàmica, duverta, ant ël contest ëd n'interscambi costant con j'àutre colture europenghe". Doi lìber susnos e fin-a grinos, da lese e da vardé. Un a se s-ciama "Citin citin", un lìber ëd gieugh e 'd travaj për ancaminé a lese, parlé e scrive an piemontèis, ch'a l'han scrivù Maria Cristina Baietto, Liliana Boino, Marilena Colombaro e Maria Angela Gallo (pp. 104, s.i.p.). L'àut a së s-ciama "Bisin bisela", në scartari 'd travaj per ij cit ëd la scòla dl'infansia, ch'a l'ha cudì Monica Nicol (pp. 56, s.i.p.). Per troveje tuti doi basta andé a la neuva libreria La Bela Gigogin ëd via Cernaja 16/D òpurament ciameje a Gioventura Piemontèisa, contra 'd San Scond 7 bis. "Citin citin" a l'è 'n silabare che come disija a fa gòj durvilo. Bej disegn e bele rimëtte per mëssoné 'd paròle, ma 'dcò per amprende a conté (an ij doi sens). Pàgine ch'a parlo d'un can ch'a vòla e a va lontan, ëd doe viture ch'a sflecio birose, 'd quat vache ch'a pasturo 'nt ël pra, 'd na ran-a coi boton colorà e 'd na ratin-a an-namorà ch'a l'ha des caplin-e bariolà. Nen da meno "Bisin bisela" ch'a varda a le masnà pi citin-e (ma 'n pò citin restoma sempe 'dcò noi che l'oma la vos rusnenta) e ch'aj mosta a dësmoresse con le anie e ij desvijarin, con ij bèro e con le faje, con le masche e con j'orcin, con ij taboj e con j'urtije, con le zinie e con le avije. Gnun-e prédiche, ma bon prinsipe 'd cola ch'a së s-ciama "glottodidattica". E dzora 'd tut ël gust e '1 sust dle paròle ch'a son-o come 'd baudëtte, alegre e rotondette. ëd Giovanni Tesio - dal Vënner dla Stampa dël 21 d'otóber dël 2005

Indietro