Siriè a lo arcòrda a 60 agn da la mòrt con un rëscontr e na letura 'd poesìe

Agn dòp agn a son sessanta da la mòrt ëd Nino Costa (1886-1945), ch'a l'é rivà dòp la mòrt dël fieul Mario, partigian an Val Chison; ch'a l'é rivà prima ch'a-i surtijssa "Tempesta", l'ultima euvra (la pì fòrta, la pì drua). A l'ha pensaje la Sità 'd Siriè, un-a 'd cole che a l'ha sempre faje onor (scòle antitolà, arcòrd mai dësmentià) e andova Costa a arpòsa për sempe. Bin piantà ant le selebrassion për ij sent agn ch'a l'è dventà sità, Siriè a l'ha 'ncora na vota pensà a memorié 'l poeta dla vita, coma a l'ha scrivù na òta për sempre Riccardo Massano : "La poesia è la sua vita e la sua vita è la sua poesia". A parlé 'd Costa ant un rëscontr ëd na matinà (apontament saba 5 novèmber da des ore a 'n bòt ant ël Salon dël Consej Comunal ëd Palass D'Oria, cors Martiri della Libertà 33) a saran ël sìndich Luigi Chiappero, l'assessor a la coltura Paolo Ballesio e la fine-fleur ëd ij studios ëd Costa, da Mario Chiesa, ch'a durvirà ij travaj, a Maria Rosa Masoero (ch'a parlerà 'd Costa e 'd Gozzano), da Giovanna Spagarino Viglongo (a-j toca a chila dëscore dij rapòrt tra Costa e la ca editris che dël poeta a l'ha publicà tut ël publicàbil e che pròpe st'agn sì a l'ha torna stampà la prima edission ëd "Fruta madura") fin-a a Dario Pasero, ch'a deurv na fnestra su l'importansa 'd Costa ant la poesìa dij poeta pì giovo ch'a s'esprimo 'n piemontèis (ancaminand da chiel). A-i sarà peui na letura 'd poesìe fàita da Michele Chiadò, tut sota 'l manegg d'Albina Malerba, ch'a l'ha cudì, ansema a chi a scriv, l'antologìa "Poeti in piemontese del Novecento" (Ca de Studi Piemontèis) che con Costa a s'anandia. Nà col "Birichin", Costa a l'è 'l poeta pì popolar dël Piemont, chiel ch'a savia scoté la vos dla gent ëd mincadì. Pacòt a parlava 'd chiel coma dla colòna ch'a res l'arch dël passà e ant l'istess temp l'arch dl'avnì. Tradission e novità, dal Setsent al Neuvsent. Longa vita d'un poeta ch'a l'è pì che giust arcordé degnament. Ij nòsti poeta a son la nòsta pì bela ardità. ëd Giovanni Tesio - dal Vënner dla Stampa dël 4 ëd novèmber dël 2005

Indietro