Un ritrat ëstòrich ëd na realtà ch'a l'é pì nen real tra fotografìe d'época e bej s-cianchèt ëd poesìa

L'ideja a le 'd cole ch'a piaso, ch'as fan vardé. As trata d'un lìber ëd fotografìe con ël ghëddo e la gràfica 'd coj ch'as vëddo ant le giojere antërnassionaj. An lo smon l'Editrice Il Punto-Piemonte in Bancarëlla (cors Siccardi, 4, Turin) e a l'ha coma tìtol "365 volte Piemonte", a l'è soagnà da Giuseppe Colli, con ij test an tre lenghe, piemontèis, italian, inglèis (le tradussion sia për ël piemontèis che për l'Inglèis a son d'Olga Maria Icardi). "Cost volum-sì - a scriv Colli ant l'Achit - che a veul esse un ritrat ëstòrich dël Piemont, vist ant soa compòsita diversità ambiental e uman-a, as serv ëd la fotografia d'epoca për ufrì al letor la vision ëd na realtà pì nen real...". Lòn ch'a fa l'originalità dël lìber, rispet a d'àutre antologie fotogràfiche, a l'è che dacant a le fotografìe d'antan për ogni di dl'an a presenta dë s-cianchèt d'euvre dë scritor e poeta ch'as combin-o franch bin con lë spirit dla fotografìa. Deurbend a cas: 16 d'avril la fotografia dij linseuj bianch ch'a suvo al sol an Bërtola, e ij vers 'd Carla Bellato Ortale "Sinch fij ëd lèssìa stendùa/ a svanto soe nòte 'nt ël vent.../l'é 'l cant ëd lëssìa ch'a sua/che mach lavandera a lo sent!"; 13 ëd giugn: Pontcianal, e ij vers ëd Bep Ross "A smiava un seugn/ ëd fé la ca lassù/ansima ai bòsch,/ a ras dij pastruraj"; 25 dë dzèmber, Turin 1910, fotografìa dël presepi mecànich dla cesa dla SS. Nunsià e Guido Gozzano "E'nato!/Alleluia! Alleluia! E' nato il sovrano Bambino./La notte, che già fu sì buia,/risplende d'un astro divino...", con tradussion an inglèis e piemontèis. E parèj për 765 pagine, con la gionta 'd na tàula dj'autor (a son pi 'd 150 j'antologisà: da Alfieri, a Brero, da Bonavero a Caballo, da Gambarotta a Censin Pich a Togliatti, da Viriglio a Vittorio Emanuele II) e dij pòst dle fotografìe (pi 'd 100, da Ala dë Stura, a Turin, vàire, a Zubiena). N'euvra soasìa, anteressanta e bela, che nen për cas a anandia na neuva colan-a editorial ch'as ciama "ël cadò". Un bel cadò da ten-e dàusin tut l'an, e për tuti j'ani a vnì. d'Albina Malerba - dal Vënner dLa Stampa dël 25 ëd novèmber dël 2005

Indietro