Na propòsta për deje 'n nòm a l'arch ross dle «Olimpiadi» ch'a fongo 'n nòste rèis

Mi am pias sto clima dla nòsta Turin Olìmpica. Na sità con un ghëddo mossant, as dirìa che ij turinèis a l'han savù buté fòra col gigèt che sota sota a l'han, e a l'han sempe avù. A l'é un piasì virolé për nòste contrà an festa. Miraco chijdun a l'ha barbotà për ël trafen, për ël bordel, a l'é vèra i l'oma dovune soporté tante, ma mi i son sicura ch'a l'é valù la pen-a. As respira an gir n'aria 'd Turin Capital, n'aria che prima mach chi a l'era bon a vardé un pòch pi an là, chi a l'avìa la coltura e la consiensa 'd lòn che la sità a l'era stàita e a savia ch'a dovìa a podìa ancor esse. E am ven drinta la gòj e l'orgheuj 'd pensé e 'd dì s-ciancà e plà che tut ël travaj sutil, silensios ma angagià fin-a ant le miole che 'd gent e d'associassion, coma la Ca dë Studi Piemontèis, a l'han fàit, con la cossiensa drita che për esse sitadin dël mond a venta avèj le rèis piantà ant un pòst. E adess che Turin a l'ha savù fé vëdde, dëdlà dle polèmiche, dle gran-e, fin-a dle malfàite ch'a saran pro staje, soa bela schin-a drita, adess Turin a l'ha fàit na bela figura, e mi i cherdo ch'a sia nen mach ëd faciada, ma andrinta 'd chila ch'a l'ha goernà, mersì a l'anga-ge 'd chi a l'ha tnù la bara drita, la nos dura 'd soa stòria. A l'é vera che i l'avrìo avù gòj che la lenga piemontèisa a fussa goernà almanch ant un cit cantonin dle Olimpiadi e sòn soma nen stàit bon a felo: ma a l'é 'dcò vera, për fé n' esempi, che na tv coma la Nbc american-a a l'ha vorsù fé un servisse sla lenga piemontèisa, coma as parla, dova as parla, lòn ch'as fa për la tùa e via fòrt. E son a veul di che tant travaj fàit sël piemontèis da studios coma Gianrenzo Clivio a l'han sëmnà ant ël mond motobin ëd pì 'd lòn che noi i pensoma. Ant cost spìrit i veuj fé na cita propòsta: a sarìa bel che l'arch ross ch'a travers ël cel ëd Turin al Vilagi Olìmpich, sìmbol dla sità neuva, a sìa batià coma omagi a nòsta antica lenga con un nòm piemontèis: mi i lo ciamrìa l'«arch-an-cel», l'arcobaleno, un «arco nel cielo» ch'a sisla la Turin ëd jer a cola 'd doman, la Turin ëd sempe. d'Albina Malerba - dal Vënner dLa Stampa dël 17 ëd fërvé dël 2006

Indietro