Ij pòst për trové le publicassion pì nòste da Viglongo a la Ca dë Studi Piemontèis

La volà a la Fera antërnassional dël lìber, che fin-a l'8 ëd magg a cangia 'l Lingòt ant la pì granda giojera 'd lìber d'Italia, a l'han tirala le manifestassion ëd Torino Capitale Mondiale del Libro. Na bela arvangia për Turin, che dòp le Olimpiadi e adess con costa inissiativa a s'arpija un pòch ëd col gust ëd Capital, che la stòria a l'avìa rancaje via. Anvitand a vnì al Lingòt sercoma 'd dè quàiche indicassion dj'editor ch'a smon-o 'dcò 'd lìber an piemontèis, bin savend, e i ciamomo përdon da sùbit, che na lasseroma daré un baron, sensa vorèilo. Ancaminoma dal Pavijon 1: Stand D 51 Viglongo, che st'an an particolar a presenta la riedission d'Alberto Viriglio, «Cronache dell'Assedio di Torino 1706»; Stand B 52 Assimil con l'edission neuva 'd trinca dë «II Piemontese in tasca»; Stand D 44, Neos Edizioni 'd Rivoli ch'a publica un racont për ij cit an piemontèis ëd Giovanni Teti (Siolòt); Stand D 52, Graphot, con ij liber ëd Borgh Vanchija 'd G. E. Ferraris, e na gran bel euvra sle Fontan-e 'd Turin; Stand C 62, Il Punto Piemonte in Bancarella, con j'euvre dla Ca dë Studi Pinin Pacòt, 'l mensil «Piemontèis Ancheuj», 'l Vocabolari ëd Camillo Brero e tant d'àutr, a fa gnanca damanca 'd dilo; al C 67 la Daniela Piazza, con ël Dissionari Gribaud. Passand al Pavijon 2, la Region Piemont con la «Libreria del Piemonte» e vàire edission dla Ca dë Studi Piemontèis, ch'a l'ha 'dcò lë Stand K 07, dova as treuva la novità novissa «Prima Mignin», d'Anna Ferrero, Fulvia e Marina Lupo compagnà da un Cd con la vos ëd Mario Brusa; la stòria dla Leteratura piemontèisa 'd Gianrenzo Clivio, con ij volum antològich; ij «Sermoni Subalpini» e 'l mèj ch'as treuva 'd lenga literatura, teatro, coltu­ra dël Piemont; sempe ant le Stand K 07 l'Artistica Editrice 'd Savian, l'editor dël Vocabolari Sant'Albin e dla Gràmatìca 'd Brero. Al Pavijon 3 segnaloma a lë Stand R 79, Interlinea 'd Noara, ch'a l'ha le poesìe an piemontèis 'd Remigio Bertolino e 'd Bianca Dorato. Bon-a Fera. d'Albina Malerba - dal Vënner dLa Stampa dël 5 ëd magg dël 2006

Indietro