An pì che vint pòst ij cors dla Ca dë Studi. Tra grand e masnà n'esperiensa bin viva

A son finije ij cors ëd piemontèis che la Ca dë Studi a masenta për cont dla Region Piemont an nòste eut province. A son anandiasse a Noara e a Lissandria 'l prim ëd mars. A son finì 'l 23 'd magg a Bra. Tre meis ëd travaj, vintun pòst impegnà a amprende a lese e a scrive 'n piemontèis. A frequenté a son stàit an tanti e tuti a l'han fàit soa part. Lession 'd gramàtica a son altërnasse con d'àutre 'd mùsica popolar, 'd literatura, 'd tradission, 'd nòm gropà ai pòst. Professor dl'Università a l'han travajà për ten-e 'l piemontèis a l'onor dël mond, ansema a 'd person-e che miraco a mosto nen a l'Università, ma ch'a son competente e apassionà. A l'é mnùjne fòra na mës-cétta për na festa ch'am pias definì «plural». A l'é travajasse an armonia con le Associassion locaj, ch'a son cole che 'd pì a cudisso 'l teritòre. Ma a l'é sempe 'dcò travasasse ant un ëspìrit largh e duvert, lë spìrit ëd cola comunità 'd destin, ch'an possa a difende 'l piemontèis come da quaich àutra part as peul difendse lë tzotzil o 'l quetchua (ma mi gionto 'dcò l'italian). La neuva pì neuva a l'é stàita la partecipassion ëd tanti giovo. Coj ch'a penso ch'a frequenté a sio mach le caviere ràire, ch'a fasso 'n pass ëndré. 'D caviere a-i na j'era tante bele s-ciasse. Lòn ch'a da la fòrsa 'd continué. Nen mach për ël bin dël piemontèis, ma për col ëd tuti noi, pòvri òm s-ciapassà da la dësmentia. Còsa nen secondaria, ij cors për ij grand a l'han marcià con ij cors për le masnà e sì a l'é fasse 'n travaj vreman fiamengh. Magistre preparà. Citin ch'as amuso. Lìber a pòsta (bastrìa arcordé «Prima Mignin» cudì da tre magistre 'd Moncalé për la Ca dë Studi Piemontèis, opurament «A pansa mòla» cudì da Valter Bergesio e Paola Costa për Nòste Rèis ant la version local ëd Bra, Cherasch e Narsòle). Ch'a veul peuj dì ognidun soa parlada. Difende 'l piemontèis ancheuj a veul dì vardé a l'avnì gropand lòn ch'a l'é pì local a la vita 'd j'òmo daspèrtut. Tut ël contrare 'd n'operassion-nostalgìa coma cheidun - bin gargh - a continua a pensé. ëd Giovanni Tesio - dal Vënner dla Stampa dël 2 ëd giugn dël 2006

Indietro