Doe stòrie tragiche për doe fomne fòrte. Torment e sangiut, paròle e suste 'd lus

Bianca Dorato a l'é un-a dle vos pì sicure dla poesìa piemontèisa e nen mach ëd cola, perché sò nòm a l'ha pijà 'n bel andi nassional. Poesìa e teatro a l'han sempre trovà pòst an chila e ant soa botega, coma a dimostro ij premi ch'a l'ha arseivù për d'euvre 'dcò rapresentà grassie a l'anteresse ch'a l'han mostraje 'd regista come Massimo Scaglione e Pier Giorgio Gili. Adess a l'é pròpe Gili a dedicheje e a soagné 'n librèt publicà da Gioventura Piemontèisa. A son doi citi test, doi monòlogh, ch'a s'entitolo «La ca&Il marchio» (pp. 63, euro 10), doi test - ël prim an piemontèis e l'àutr an italian - con n'introdussion, na bibliografia essensial, l'indicassion dle euvre rapresentà dla Dorato, le notissie dle doe atriss che ì'd tute a l'han travaja-je 'nsima, vis a dì Giulia Polacco e Giovanna Fiscella, ch'a l'han doe bele maschere dramatiche. «La ca» a l'é la stòria 'd na fomna che sòi fieuj a veulo dësrejsé, gavandla da sò mond, ansi - come chila a dis - dal «cheur dël mond», coma se gnente a fùissa. Lassé la ca, vende la ca dla vita a l'é come abandoné la vita. Na stòria ch'a diventa tragedia. Un farò 'd paròle ch'a svanto ant un-a fìamà d'angossa e ant un-a mòrt sacrifical. Nen tan diversa la stòria «Il marchio». Ant un temp marcà da n'aria sensa temp, na fomna ch'a trata le erbe e ch'a sa fé la maisinòira as treuva perseguità da la gent ch'a la considera na strija. Na fomna sola ch'a viv 'ndrinta a soa solitudin. Ma pì che le stòrie come taj, sempe 'nt ël mond dla Dorato a conto ij moviment interior. A-i-é sempe l'ambientassion dla montagna, ch'a l'é la soa e da lì a së scapa nen (na montagna 'd vos, 'd crij, 'd solitudin, d'erbe, 'd bes-ce e 'd pere vive, d'ombra e lus, ëd combe e 'd drere, ëd pass e 'd vòj, 'd serv e 'd luv). Pì che tut torment e gòj d'anime an serca, ch'a bramo na forma 'd redension, ch'a sento 'l fardel dla vita anflà, ch'a susto la lus tra «jë sbrincc ëd mota e le spluve nèire dël fot». Teatro 'd paròla e 'd poesia s'a-j n'a-i é un. Teatro che con Bianca Dorato a fa tut un. ëd Giovanni Tesio - dal Vënner dla Stampa dël 16 ëd giugn dël 2006

Indietro