La stòria bela dla bandiera dij tre color vos dij sécoj dl'identità piemontèisa

Le giornà a së scorso, l'istà a së slontan-a an pressa, 'l trafen dla sità a l'ha, darmage, pià sò gir. Anlora a l'é bel ancaminé con la stòria 'd nòst drapò piemontèis, un lìber surtì an sla broa dl'istà, përchè për boneur nòsta lenga a l'é nen andàita an ferie e gnanca an giubilassion. «Drapò. Aràldica, stòria, ideal», surtì a Biela da L'Ëscurs Ca Editris, për la Festa dël Piemont 2006 ch'a fa 39, test an italian e an piemontèis a front, scrit da Mario Coda, Giacomo Calleri Damonte e Tavo Burat. Na cita publicassion, ma motobin pressiosa, ch'a veul esse un mojen a la portà 'd tuti, piemontèis e nen, për conòsse e fé conòsse ëd drapò dël Piemont, nòsta bandiera, ufissialisà con lèj regional dël '95, dòp nen pòche bataje. Drapò che a l'é, coma a scriv Coda «col che la gent piemontèisa, për via 'd soe associassion colturaj, con Ij Brande an prima fila, a l'ha sèmper arvendicà». Dacant al drapò, venta ch'i marco e amprendo 'dcò a dì an piemontèis: ël blason (lë stemma) e '1 gonfalon; tut bin spiegà ant ël lìber. Dòp cost capìtol ëd Coda su «Ij sìmboj aràldich ëd Piemont», a ven-o le pagine 'd Barba Jaco, Jaco Calleri, poeta Brandé 'd Graja, che a fa la stòria dla prima Festa dël Piemont e dël drapò, dël luj 1968 a Biela përchè un di chijdun a peussa arcordé «quand, anté e përchè, nen vàire òimo, con nen vàire mojen, ma debordant d'entusiasm passionà, a son ëstàit bon ëd torna restituì al Piemont sò drapò». Sislà sota '1 titolèt «Ideal» a sarò 'l lìber doi test ëd Tavo Burat: «Ël prim artìcol sël drapò», gavà da Musicalbrandé stèmber 1968, e «J'ansëgne dla Nassion Piemontèisa», 'l drapò dij tre color an tre fasse, 'l ross, ël bleu e 'l portigal, ispirà dal giacobin Giovanni Antonio Ranza, aussà për la prima vira ël 25 d'avril dël 1796, e che ancheuj i trovoma arcordà ant ël Gonfalon dla Region Piemont. Pòche pagine ma bin satìe dë stòria për avèj conossensa e cossiensa 'd tut lòn ch'as goerna drinta a un drapò, në s-cianchèt 'd tèila a color ch'a s'aussa al vent coma vos dij sécoj 'd nòsta identità. d'Albina Malerba - dal Vënner dLa Stampa dl'8 dë stèmber dël 2006

Indietro