La literatura e l'assedi 'd Turin dël 1706 da Viriglio a Eco, da Calandra a Tiochet

La Fojada guardé bin,/ I lasroma pa pié Turin./ Con le vòstre canonade/ Fei pa por a le masnà./ Batì pur la sitadela. Che Turin a s'guarnerà». A son ij vers d'un-a antica canson popolar cuija da Costantino Nigra ant l'Eutsent, ch'a arcòrda l'assedi e la liberassion ëd Turin dël 1706. Sitassion ch'i gavoma da la bela antologìa 'd test dë scritor «anlitrà» an piemontèis, an fransèis e an italian (da Saint Simon a Raby, da Edoardo Calandra a Guido Gozzano, da Vittorio Bersezio a Marziano Bernardi a Umberto Eco, ecc.), ant un-a publicassion ch'andrà an costi di an libreria për le edission dla Ca dë Studi Piemontèis: Pier Massimo Prosio,« Vittorio Amedeo, Prinz Eugen, Pietro Micca: l'assedio di Torino visto dagli scrittori», con n'introdussìon ëd Luciano Tamburini, «Da Micca a Porthos» (pp.84). Ant ël liber i trovoma antologisà, për lòn ch'a riguarda le testimonianse an lenga piemontèisa, 'l Tarizzo dl'«Arpa discordata», Alberto Viriglio, Nino Costa, Arnaldo Soddanino, Carlin Tiochet, e d'àutri, e fin-a col Filippo Tartufari, un poeta roman a Turin, amis ëd Còsta e d'Olivé. I sitoma cost'euvra, për armarché coma a son dabon tante le inissiative editoriaj e le manifestassion ch'a son butasse an tren për la ricorensa dij tërsent ani 'd na data stòrica, col 1706 ch'a l'ha decidù le sòrt dël Piemont e fórse 'dcò dl'Euròpa. Chi a veul fesse n'ideja 'd lòn ch'a l'é stàit cost aveniment stòrich a peul visité a la Sitadela (e peui al Museo 'd Pero Mica), la mostra dl'Associassion Torino 1706-2006, «L'alba di un regno» (dal màrtes a la duminica da neuv ore dla matin a set ore dla sèira, catàlogh soagnà da Roberto Sandri Giachino, Gustavo Mola di Nomaglio, Giancarlo Melano për le edission il Punto 'd Turin), o pijé part al Convegn stòrich che sota 'l midem tìtol, an colaborassion con l'IRRE Piemonte, ël fin sman-a ch'a-i ven a radunrà al Centro Incontri dla Region na sinquanten-a dë studios për parlé sël tema dl'assedi 1706 «tra spirito europeo e identità regionale». d'Albina Malerba - dal Vënner dLa Stampa dël 22 dë stèmber dël 2006

Indietro