Ij cors ëd piemontèis

A fa des e a l'é pròpe 'n bel numer. Des agn, des vire che la Ca dë Studi Piemontèis a organisa për cont ëd la Region Piemont (Assessorà a la Coltura) i cors che st'agn a së s-ciamo «Il piemontese. Gli scrittori, le opere, i luoghi, le parole». La scomëssa a l'é pì nen mach na scomëssa ma na realtà. Nen mach ten-e da cont lò ch'an ven da na richëssa che tròp soens a l'é 'ncora considerà da gnente (a fa pa basta fin...) o da pòch (al temp dl'ingleis, a va pa basta bin...) ma 'dcò dimostré che conòsse 'l piemontèis a l'é nen, coma serti a continuo a chërde, impossibil o mal fé. Tut àutr. Tersa, ma nen ultima rason, corisponde a la lege regional dël 10 d'avril 1990 (la lege 26), nà për la tua, la valorisassion e la promossion dl'original patrimòni lenghistich dël Piemont. Sinch mila iscrit an neuv agn d'atività a dimostro che la veuja 'd chërde a cheicòs ch'a va pì 'n là 'd lòn ch'a smija a prima vista a l'é nen pòca. Lòn ch'a cissa a continué. Nen mach. Lòn ch'a cissa a 'nventesse 'd còse neuve. Tant për dì, 'st'agn sì a l'é cambiaje la diression (a masenté la facenda Albina Malerba), a l'é giuntasse la fòrsa 'd doi nòm come coi 'd Davide Damilano e Giulia Pennaroli come coordinator, a l'é s-ciuduje d'ideje na frisa pì bariolà. Lòn ch'a-i va për fé an maner a ch'a-i sia sempe cheicòs ch'a dogna fiusa e gigèt (a basto mai). I cors a son aumentà 'd nùmer: spatarà 'nt ël capleu regional e ant ij capleu 'd provincia (da Turin a Biela, da Ast a Vërsej, da Lissandria a Cone) e 'n tanti d'àutri pòst ch'a son Cavalion (na sede neuva noventa) Salusse, Aich, Alba, Ivreja, Savian, Carmagnòla, Moncalé, Mondvì, Pinareul, Varai, Susa, Bra, Biela, Ciriè, la Piev (an pròvincia 'd Verbania, sla strà për Dòm). Duvert a tuti, completament a gratis, ij cors a son fàit d'eut lession ëd doe ore për vota. Na tranten-a 'd pròfessor qualificà (da Giuliano Gasca Queirazza a Tavo Burat, da Massimo Scaglione a Gianfranco Gribàud, da Censìn Pich a Sergi Gilardin, da Giusep Gorìa a Dario Pasé, da Gianni Davico a Sergi Garuss, e tuti i nòm a-i stan nen...) për mostré a conosse lenga e coltura, paròle da dì e paròle da cudì, scritor e literatura piemontèisa. Le lession a son anadiasse a la Piev vënner passà, ma peui ancamin-o squasi tute sman-a coèn: a Ivreja e an Ast 'l 2 'd mars (Albina Malerba che a Ivreja a parla 'd «Renzo Gandolfo: il piemontese come ideale civile, Giuseppe Perrone che an Ast a parla 'd «Parole nostre: leggere, parlare, scrivere»), a Savian 'l 6, a Carmagnòla 'l 7, a Pinareul l'8 e via fòrt. Për savèjne 'd pì a basta telefoné a la Ca dë Studi Piemontèis (011/ 53.74.86). N'inissiativa ch'as gionta a d'àutre. Tute ansema a fé na bela prima. ëd Giovanni Tesio - dal Vënner dla Stampa dël 2 ëd mars dël 2007

Indietro