La Fera dël Lìber

Pen-a sarà le manifestassion për Torino Capitale Mondiale dël Libro, con lë slogan «Venti, senza confine» as deurb sùbit la campagna për ij vint'ani dla Fera antërnassional dël lìber che dal 10 al 14 ëd magg a cangia 'l Lingòt ant la pì granda libreria d'Italia. La Fera a l'é 'dcò n'ocasion d'òr për andé a la sèrca 'd test e editor an lenga piemontèis sempe pitòst malfé a trové ant lë giojere dle librerie, gavà 'd cole doe o tre «specialisà» coma Piemonte in Bancarella, La libreria Piemontese o la Bela Gigogin. Për feje festa ai vint ani dla Fera, ancaminoma dal Pavijon 1: Stand D 51 Viglongo, l'editor ëd Nino Costa, ëd Brofferio, d'Isler, dij romans an piemontèis; sempe a l'1: Stand S 41, Il Punto Piemonte in Bancarella, con j'euvre dla Ca dë Studi Pinin Pacòt, 'l mensil «Piemontèis Ancheuj», 'l Vocabolari ëd Camillo Brero e tant d'àutr; Stand D 44, Neos Edizioni 'd Rivoli ch'a pùblica ij racont e lë poesie ëd Giovanni Teti (Siolòt), e a l'ha anandià d'àutre edission ëd racont e poesìe an piemontèis, coma lë «Conte e pitanse» 'd Vittoria Minetti; a lë Stand D 52, Graphot, con ij lìber ëd Borgh Vanchija 'd G. E. Ferraris, e neuv noviss ël lìber lë «Canson dla Piòla» 'd Pìergiorgio e Roberto Balocco; al C 87 Daniela Piazza, con ël Dissionari Gribaud e lë poesìe an piemontèis ëd Giovanni Arpino, «Bocce ferme». Passand al Pavijon 2, Stand K01 la Ca dë Studi Piemontèis, dova as treuva la ristampa dla prima «Gramatica» an piemontèis, cola dël Maurizio Pipino, 1783; 'l lìber per lë scòle «Prima Mignin»; la stòria dla Leteratura piemontèisa 'd Gianrenzo Clivio, con ij volum antologich e 'l mèj ch'as treuva 'd lenga e coltura dël Piemont; dàusin lë Stand K03 l'Artistica Editrice 'd Savian, l'editor dël Vocabolari Sant'Albin e dla Gràmatica 'd Brero. Al Pavijon 3 segnaloma a lë Stand R 71, Interlinea 'd Noara, ch'a l'ha lë poesìe an piemontèis 'd Remigio Bertolino e 'd Bianca Dorato e cole ëd Beppe Mariano. A son mach ëd sitassion: d'àutri editor për ël piemontèis a-i son ëd sicur e a venta andeje a susné për le viassòte dël Lingòt. d'Albina Malerba - dal Vënner dla Stampa dël 4 ëd magg dël 2007

Indietro