Milo Bré (Camillo Brero)

Tuti an Piemont a conòsso Camillo Brero. E adess che Brero a l'ha da pòch tajà 'l traguard dj'otantani 'dcò ant la Capital a l'han ancorsusne ch'a-i j'é: 'l 2 ëd giugn a l'é stàita conferìa a Camillo Brero l'onorificensa 'd «Cavaliere della Repubblica për meriti culturali». Pròpe na bela e bon-a neuva, ch'a mérita na festa con ij fiòch e le frange, përchè la mudaja pì bela ch'as peul desse a Brero a l'é la bin ëd soa gent. Ij festegiament, soagnà da l'Associassion dj'Amici dell'Arte 'd Pianëssa, as faran saba 30 'd giugn, a sinch ore dël dòp disné ant la Sala Convegni dl'Obergi Gallia 'd Pianëssa (via Turin 29A). Dovoma a Brero nen mach paròle 'd poesìa, ma jë strument përchè nòsta lenga a peussa marcé për ël mond e anrolesse ant la caden-a dle generassion: «La gramàtica piemontèisa» (an vàire edission dal 1967 fin-a a l'ùltima, con la colaborassion ëd Remo Bertodatti për l'Artistica Piemontese, dël 2003); ij doi vocabolari «italiano-piemontese» e «piemontese-italiano» (adess surtì ant un volum sol për l'edission Il Punto-Piemonte in Bancarella). E a son mach citassion d'un travaj che da l'ancontr con ël màgister Pinin Pacòt e la Companìa dij Brandé ant ël 1946, a l'ha pì nen avù sosta. Da la cura, tuti j'an d'«Ij Brandé. Armanach ëd poesìa piemontèisa», a la colaborassion con Renzo Gandolfo dla bela «Letteratura in piemontese dalle origini al Risorgimento» (1968), ai tre volum tuti sò dla «Storia della letteratura in piemontese» (1981-1982), al mensil «Piemontèis ancheuj», ch'a l'ha fondà dël 1982 e che ancor ancheuj a dirigg, a l'angage ant le scòle për ij cit, a le trasmission ant television, j'otantani 'd Brero a son un itinerare d'amor për nòst Piemont. Amor ch'as deurb a l'incantament mersì a soe euvre 'd poesìa: da «Spluve», 1949 (con la prefassion ëd Pinin Pacòt) a "Vos dl'etern present" (con l' achit ëd Giovanni Tesio). Amor, bin, lus, fior, infinì, Dé, a son le paròle tëssue ant ij vers ëd Camillo Brero. Tante ròbe bele, Milo. Che la bin at guerna! d'Albina Malerba - dal Vënner dla Stampa dël 29 ëd Giugn dël 2007

Indietro