La Gramàtica 'd Guido Riva

Ant costi di a l'é an librerìa la neuva edission, arnovà ant la vesta gràfica, dla «Grammatica della lingua piemontese» 'd Guido Griva (1909-1994) publicà da Viglongo (via Genova 266, Turin, tel. 011/606.04.21; fax 011/682.08.67, pp.112, euro 11) con na prefassion sota 'l tìtol 'd «L'editore al lettore» 'd Giovanna Spagarino Viglongo, mentre a resta - e bin ch'a l'ha fàit l'editor a lassela - la «Premessa» a la prima edission, mars 1980, d'Andrea Viglongo. Da sì gavoma sùbit na citassion ch'a në smija 'mportant armarché: «L'idea che i dialetti contraddicano alla lingua è un pregiudizio. I dialetti sono uno dei grandi serbatoi dël buon italiano (Filippo Crispoldi, 1911)». Lë stat dla lenga italian-a d'ancheuj a peul mach esne na conferma. Le pòche ma satìe pàgine 'd Giovanna Viglongo a veulo anvece esse un omagi a l'autor, un gentilòm piemontèis d'àutri temp, scritor an lenga italian-a e an piemontèis, latinista, apassionà 'd montagna, bibliofilo, «dotato - sitoma da la prefassion - di tal garbo e signorilità da parere un perfetto diplomatico dell'Ottocento». Se tanti a conossìo Guido Griva coma poeta e scritor, an particolar për la tradussion an piemontèis ëd col caplavor ch'a l'é «Pinocchio» (Viglongo, 1981) e për costa «Gramàtica», miraco pòchi a san che a l'é stàit pròpi chiel che con Pinin Pacòt a l'ha dàit vita dël 1946 a «La Piemontèisa», società 'd coltura e dë studi piemontèis ch'a l'avìa sede an via Bogin 25, «antesignana di tutti i sodalizi nati, in seguito, a tutela del patrimonio spirituale del Piemonte e delle sue molteplici espressioni». Bin a l'ha fàit la Ca editris Viglongo a torna porté an librerìa cost'euvra, ch'a servirà ai piemontèis, e, cost a l'era l'idea 'd Griva, 'dcò a chi piemontèis a l'é nen, ma ch'a podrìa avèj la sensibilità e l'inteligensa d'esse na frisa curios dla lenga ch'as parlava e ancora as parla an coste tère, e për sòn a l'avìa scrivula an italian. d'Albina Malerba - dal Vënner dla Stampa dël 5 d'otóber dël 2007

Indietro