«Leggende delle Alpi» 'd Maria Savi Lopez

Piemonte in Bancarella a pòrta an giojera an costi dì la ristampa, con n'introdussion 'd Massimo Centini, d'un euvra motobin anteressanta, surtìa dël 1889: «Leggende delle Alpi» 'd Maria Savi Lopez (pp. XXXII-358, euro 15). Ma chi a l'era Maria Savi Lopez? I l'oma parlane con Giuseppe Goria, studios angagià e original ëd leteratura piemontèisa che sla vita dl'autris a l'ha fàit diverse arserche: «A nassìa a Nàpoli al 6 d'avril dël 1846 e a rivava a Turin giovo 'ma tut con sò pare, esilià dal Regn ëd le Doe Sicilie për soe idèje liberaj, che a j'ero già stàite angage 'd vita për d'àutri 'd soa famija. A muirìa dël 1940. Famija avosà, cola 'd Maria, ij Lopez y Pardos, cavajer dël Regn dë Spagna, a son rivà ant la capital partenopea ant ël 1784, dapress a Carl ëd Borbon. D'idèje neuve a l'han portà djj Lopez a l'esili e ‘l pare 'd Maria a sò abrì turinèis. An costa sità chila a l’é chërsùa, a l'ha studià e a l’é mariasse dël 1875 con ël piemontèis Savj, pare dël fieul Pàul (25 ëd noèmber 1876). Cost-sì, laureà a Nàpoli ant l'ann académich 1897/98, docent a j'università 'd Pavia e 'd Catania, a l’é stàit tradutor dë Schopenhauer, ma dzortut ëstudios ancreus ëd le lenghe romanze. A muirìa a Nàpoli al 27 ëd fervè dël 1919, ant la sità che a l’é restaje gropà, coma la mare, a l'istessa manera 'd Turin. E a l’é miraco franch për cheuje an pien l'ardità e la tradission ëd le doe famije che a l'ha vorsù gionté a sò nòm ëd nassensa, Savj (a na fa fé la scheda anagràfica), ël tratin e 'l nòm ëd la mare, parèj com a l’é mansionà ancor ancheuj ant soa dissiplin-a». E 'l lìber dle legende? «La cujìa passienta - a fortiss Giusep Goria - 'd material narativ orali e popolar ëd Maria (bele ant soa manera pìi leteraria che sientìfica) a pòrta un contribù a la conossensa d'un passàa comun che l'Anconsient coletiv an arvela ant ël Mit; ël travaj dël fieul, dal léssich e da le fonètiche dla bassa latinità e dle parlade volgar, a marca la stra e la diression dle lenghe e dle literature neolatin-e». Faje, fior, faunèt, masche, culès, montagnin, castej, castagne, lagh...un mond fantastich e amusant cost dle «Legende delle Alpi». A l’é nen scrit an piemontèis, ma a val la pen-a sitelo an costa sede per ël valor ch'a l'ha për la nòsta stòria popolar e për la nosta stòria tut curt. Sensa conté che l'ocasion dla ristampa a peul ëdcò esse ansiganta për arlese d'àutri travaj dla turinèisa adotiva (coma a l'ha bin spiegane Goria) Maria Savi-Lopez. d'Albina Malerba - dal Vënner dla Stampa dël 14 dë dzèmber dël 2007

Indietro