Turin ch'a son-a, ëd Roberto Cognazzo

Con ël tìtol «Turin ch'a son-a», mersì a l'angage dël Rotary International, a l'é surtìe un Cd ëd mùsiche dël Maestro Roberto Cognazzo, fortepiano e piano (Edizioni Leonardi, Milano; registrà ant la Sala Concerti dla Comun-a 'd Verolengh con doi stument stòrich; diression artistica Adriano Giacometto e Roberto Ricco). Dì ij mérit ëd Cognazzo për la mùsica nòsta, cola còlta e cola popolar (ma a l'ha sens costa distinsion?); 'd Cognazzo concertista, da sol e con ëd cantante e con d'àutri musicista; coma docent al Conservatòri, ma ëdcò come docent dij Cors ëd formassion dla Ca dë Studi Piemontèis e dla Region Piemont, coma studios e autor ëd lìber, coma conferensié, a j'andarìa un travaj bin fosonant, che a ventrà un di o l'àutr fé. «Turin ch'a son-a», tìtol che Cognazzo ant la plachëtta ch'a compagna 'l Cd a spiega come se a val la dita «Turin ch'a bogia», a venta 'dcò parlé, e as na parla tròp pòch, 'd Turin ch'a son-a. La Turin che a ven evocà an cost Cd a l'é cola ch'a va dal 1831 (l'an dla composission dla Marcia d'Ordinansa, peui Real dòp dël 1861), fin-a a j'ani 30 dël Neuvsent. Oltra a costa marcia ant ël Cd i trovoma, La Giandojeide, la Marcia dël Gran Bogo, un Fiat valzer d'Osvaldo Brunetti, fin-a a un Buenos Ayres, tango argentin d'Ermenegildo Carosio. 22 tòch da scoté con gòj (për savèj ëd cost Cd, a basta telefoné al Rotary: 011/562.12.08). N'àutr Cd «piemontèis» an riva 'nvece da 'n Merica: «Rèis monfrin-e», poesìe e canson an piemontèis soagnà da Bobby Tanzilo, Gian Piero Morano e Vincenzo Marchelli, dij «Monferrini in America» dl' Associassion Piemontesi nel Mondo dël Northern California. Poesìe 'd Luigi Reposo, Nina Prati, Luciano Ravizza; canson dl'Ariondassa, dël Canzoniere Monferrino, 'd Joseph Cerrina, I Sonador dal Ravi, Alfredo Rota. La plachëtta a l'é an piemontèis e an inglèis (anformassion: www.monferrini.com). d'Albina Malerba - dal Vënner ëd La Stampa dël 7 ëd mars dël 2008

Indietro