Bianca Dorato. Poesìe 1984-2006

Ël lìber «Bianca Dorato. I lenti giorni. Poesie 1984-2006», soagnà con sensibilità profonda e squisìa da Anna dë Simone e con na presentassion ëd Giovanni Tesio, a l'é surtì a Grado 'l 13 ëd fervè dël 2008, ant ël prim aniversari dla mòrt dla nòsta poetëssa piemontèisa pì soasìa «una delle voci poetiche più alte e appartate del nostro tempo », coma a dis la dë Simone, che a l'ha sernù la lenga piemontèisa për esprime an manera àuta sò «itinerarium mentis et cordis». Ëd ràira elegansa gràfica a l'é 'l prim quaderno dla colan-a editorial dël Centro Studi Biagio Marin (Pisa-Roma, Fabrizio Serra, 2008, pp.80), 'l poeta 'd Grado ch'a l'é stàit un dij «maestri» 'd Bianca Dorato. N'antologìa 'd 28 poesìe, sernùe da soe racòlte «Tzantelèina» (Ca dë Studi Piemontèis, 1984), «Passagi» (Boetti e C., 1990), «Drere 'd Lus» (El Pèilo, 1990), «Fiòca e òr» (El Pèilo, 1998), «Travèrsere » (La Slòira, 2003), «Signaj» (Interlinea, 2006); 4 poesie inèdite, goernà con tanta bin ant l'archivi 'd Bianca Dorato da soa sorela Margherita. A-i é peui 'n test inédit an italian, scrit da Bianca për un convegn organisà da l'Università 'd Trieste, da l'Università 'd Pécs e dal Centro Studi Biagio Marin, a Trieste, ant le stèmber 2006, dova Bianca a l'ha nen podù andé 'd pèrson-a për ij problema 'd salute, e a l'ha mandalo a Edda Serra ch'a l'ha lesulo. Ant soa introdussion Anna dë Simone a arcòrda, con paròle ch'a emossion-o, sò ancontr con Bianca a Grado dël 1991, quand a l'ha avù 'l premi 'd poesìa Biagio Marin : «La nostra amicizia é nata... in una Grado autunnale piena di sole e di memorie mariniane... ». N'ancontr ch'a l'ha marcà un rapòrt uman e literari, che an costa racòlta as sent bate ancreus, e a rend n'omagi soasì a na granda piemontèisa, da na tèra diversa e sorela, përchè la poesìa a l'ha nen finagi e l'arson dle paròle 'd Bianca Dorato, a son sempe da vsin a nòst cheur. d'Albina Malerba - dal Vënner ëd La Stampa dël 21 ëd mars dël 2008

Indietro