Manifestassion al Còl dl'Assieta

L'an a l'é 'l 1747: ij Fransèis a passo 'l Monginevr e a rivo ant la Val ëd Susa e ant cola dël Chison, për ciapé vers Turin. Ma a-i son a sentinela ij Fort d'Exilles e col ëd Fenestrele ch'a-i saro la stra. As combat sle montagne fin-a al 19 ëd luj, di che al Còl dl'Assieta, a 2500 méter, as ten lë scontr pì sangonant: tërdes batajon piemontèis e quatr austriach a mando a derota sinquanta batajon fransèis. A l'é un-a dle pì amportante bataje dla stòria piemontèisa, l'ùltim episòdi significativ dla Guèra 'd Sucession d'Austria, ch'a l'ha vist ij batajon piemontèis ëd Carlo Emanuele III ëd Savòja ficheije ai fransèis ëd Luigi XV. A la Testa dl' Assieta un monument, euvra 'd Riccardo Brayda (1882) a arcòrda la bataja e j'òmo piemontèis che lassù a l'han lassà soa vita për la patria piemontèisa. A cost Còl, sentù coma sìmbol dla libertà dël Piemont, a mes luj ij piemontèis a torno për la manifestassion central dla Festa dël Piemont, organisà da 41 ani da la Companìa dij Brandé, con l'Associassion Festa dël Piemont al Còl dl'Assieta, la Comun-a d'Usseaux, e la tua dël Consèj Regional dël Piemont. Ël randevó 2008 a sarà për duminica 20 ëd luj a ancaminé da neuv e mesa dla matin, con cost programa: a 10 ore mëssa al camp; dal pì al meno a 11 ore comemorassion dla Bataja an sla testa dl'Assieta, con na dimostrassion dë Grop ëstòrich Pietro Micca 'd Turin; apress polenta e sautissa a la Ca Cantonera; dòp disné a-i saran grop folclorìstich , coraj, fanfare e gieugh për ij cit. Për ij pì dëgordì, coma a dis ël tilèt «la Festa a ancamin-a già la matin ëd saba 19, con na prima comemorassion dla bataja e con la partessipassion dij Granadié». A l'Assieta as peul montesse, an vitura o a pé, da Susa Mean-a Còl ëd le Finestre o da Fenestrele (Balboutet). Për tute le anformassion ciamé ij nùmer: 360/53.50.35; 337/22.54.01; o vardé 'l sit (www.festa-del-piemont-alcolle-assietta.it). d'Albina Malerba - dal Vënner ëd La Stampa dl'11 ëd luj dël 2008

Indietro