Salvatore Viviani e Seto

Seto a selebra st'ani ij 50 ani dël tìtol ëd Sità. Për costa ocasion, tra le tante manifestassion, ël Gruppo Ricerche Etnografiche Settimesi (che an costi ani a l'ha da fàit ëd travaj fiamengh për Seto e 'l teritòri, da j'arserche sle cassin-e ai gieugh, da j'industrie a le figure ch'a l'han disegnà la fisonomìa local) a arcòrda con un bel lìber 'l poeta setimèis Salvatore Viviani {Turin 1920, Seto 2007). Sota 'l tìtol «L'Éira d'Amor. Settimo Torinese nella poesia di Salvatore Viviani», soagnà, për L'Artistica Editrice, Paolo Silvetti a l'ha cujì tute le poesìe che Viviani a l'ha dedicà a Seto: dal sonèt «Seto Turinèis» a «'Nt la contrà dl' L'Éira d'Amor», ch'a dà 'l tìtol al lìber, na veja piassëtta stòrica (dal nòm ëd na nòbila famija setimèisa , j'Amour, ch'a vnisìa da Chambèry), da «La Bela Lavandera» a la «Procission dël Corpus Domini», da «Ciòche neuve 'd me Pais» a «Per ël sentenari dla Banda Musical ëd Seto», a la pròsa «Ca dël Mago». Un bochèt ëd poesìe ch'a conto la stòria cita 'd na comunità: la gent, ij travaj, ij canton, j'aveniment, ij ricòrd, che le bele fòto d'antan a compagno con grassia e nostalgìa. Na manera 'd resiste a lë stravolgiment che Seto a vivìa con ij neuv insediament, tonelà 'd cimant ch'as mangiavo la campagna, 'l paisagi, 'l verd. «Viviani - a scriv Paolo Silvetti ant la Premëssa - vide con i propri occhi gli effetti devastanti delle trasformazioni demografiche, sociali e urbanistiche e più di una volta si schierò a difesa dël passato cittadino», e an costi vers as peul artrovesse col mond përdù «quello della Settimo della sua memoria, fatta di angoli suggestivi, di personaggi popolari, di mestieri della tradizione, spazzati via da un paese diventato troppo rapidamente città». Na biobibliografìa 'd Viviani, con soe fotografìe e un CD con ij test lesù da Mario Brusa (mùsiche e canson d'Alberto Cesa e Cantovivo), a na fan nen mach un lìber ëd poesìe, ma na bela testimoniansa dë stòria e d'amor. d'Albina Malerba - dal Vënner ëd La Stampa dël 12 dë stèmber dël 2008

Indietro