Remo Bertodatti a l'ha lassane

I l'oma 'ncaminà 'l 2008 con la segnalassion d' «Ij Brandé. Armanach ëd poesia piemontèisa 2008», soagnà da Remo Bertodatti, con d'àutri amis. E adess, mentre s'anviaroma ai mèis ch'an pòrto a saré l'an, i dovoma parlé 'd Remo për arcordene 'l travaj, l'angage për sò Piemont, an tanti ani 'd «servissi» a la bon-a bataja, përchè ant ël cheur dl'istà Bertodatti a l'é andasne për sempe. Canavzan ëd San Giòrs, ovrié a la Fiat, fòra dij cancej dla fabrica soa vita a l'é stàita marcà da l'ancontr con 'l moviment poétich dla Companìia di Brandé, an particolar con Camillo Brero e con Giovanni Morello ('dcò lor an Fiat). Na militansa piemontèisa la soa vivùa pitòst daré dle quinte, për fé fosoné le ròbe, butandje cheur e passion. E da quand a l'era 'ndà an pension tut sò temp a l'era për ël piemontèis. Vàire vote da coste pagine a l'é capitane 'd parlé 'd lìber ch'a l'ha soagnà ansema a d'àutri, për Caslëtte, Alpignan, travaj d'arserche etnografiche e lenghistiche fàite a la bon-a, ma motobin pressiose për col drit a la memòria che ògni travaj, ògni pera, ògni vos a dovrìa avèj. A va arcordà sò angage për fé andé anans ël mensil «Piemontèis ancheuj»; la colaborassion për l'edission neuva dla «Gramatica piemontèisa», 'd Camillo Brero; ij cors ëd piemontèis dl'Università dla Tersa Età, e na baronà d'àutre ròbe sempe con ël pensé sincer ëd serve për ël Piemont e la lenga piemontèisa. «Mi i vurerìa esse - a scrivìa - des vòlte pì ativ për cissé e giuté negossiant e artigian a buté j'ansëgne an piemontèis. I vurerìa esse sent vòlte pì 'n piòta për ampinì le scòle 'd Piemont ëd material didàtich ch'a blaga nòsta lenga... ». Un programa 'd vita che 'l cheur gròss ëd Remo Bertodatti a l'ha portà anans fin-a a l'ùltim respir: «It se mè tut Piemont, l'orisont e but ëd vita 'Patria Cita' com un vers: me univers!». ëd Giovanni Tesio - dal Vënner ëd La Stampa dël 10 d'otóber dël 2008

Indietro