Stren-e për Natal

Per ël Natal 2008 i segnaloma come stren-e 'd lìber ch'a duro ant ël temp. L'Editrice Il Punto-Piemonte in Bancarella a propon na neuva edission dël «Nuovo Vocabolario piemontese-italiano e italiano-piemontese» 'd Camillo Brero, ristampa sensa cambiament rispet a la version precedenta, ant un cofanèt con la «Grammatica e sintassi della Lingua Piemontese», sempre 'd Brero, ristampa dla prima Gramàtica 'd Bré. Sempe da Piemonte in Bancarella a-i seurt 'l «Armanach dij Brandé» 2008, cudì da Giusèp Goria, con test dij Grand ëd la literatura piemontèisa e djë «scritor pì avosà d'ancheuj: na vera antologìa 'd lòn ch'a l'é stàit prodovù an lenga piemontèisa con la bela ambission d'esse në strument për chi ch'a veul tense agiornà sl'evolussion ëd la nòstra lenga an tute le soe noanse. La «Grammatica piemontèisa» 'd Brero e Bertodatti, cola scrita an italian, as treuva anvece ant le edission dl'Artistica Editrice 'd Savian. Da l'editor Viglongo, già recensì da coste pagine, i segnaloma la neuva edission dla «Grammatica piemontese» 'd Luigi Griva, e la ristampa dël «Pinòcchio an piemontèis», ant la tradussion sempe dël Griva; oltre a le edission dl'Isler, Brofferio, Pietracqua, Nino Costa e via fòrt. Graphot a presenta për le feste 'l neuv lìber ëd Gian Enrico Ferraris, «Il Borgo si racconta. Vanchiglia, Vanchiglietta e Borgh dël fum», an italian, con test, canson e arcòrd an piemontèis; e Ugo Sartorio, «Borgo Vecchio e dintorni. San Donato, Campidoglio e Parella»; Maurizio Ternavasio, «Crocetta. Storia di un Quartiere». A la Ca dë Studi Piemontèis as treuvo le edission dij tre volum clàssich dla «Leteratura an piemontèis», soagnà da Gianrenzo Clivio, da Giuliano Gasca e da Dario Pasero; pen-a surtìa la racòlta 'd tute le «Poesìe» 'd Tavo Burat, e un bordel d'àutre autor piemontèis. Ëd Giuliano Gasca Queirazza 'l volum, «Nomi di famiglia piemontesi», ch'a rivrà pròpi an costi di an libreria. d'Albina Malerba - dal Vënner ëd La Stampa dël 19 dë dzèmber dël 2008

Indietro