La Fera dij lìber 2009

«Mi, noi, j'àutri/Io, gli altri» a l’é ‘l tema dla Fera antërnassional dël lìber dal 14 al 18 ëd magg (al Lingòt). Coma ormai da quàiche ani la Region a organisa e a ospita ‘l programa ch'a va sota ‘l tìtol «Lingua madre» che a l'ha ant ij sò but la tua dla «diversità linguistica», ch'a riguarda però le lenghe cite dël mond grand. La novità st'ani a l’é che për la lenga piemontèisa e j'àutre minoranse lenghìstiche dël teritòri, ‘l Consèj Regional dël Piemont ant sò Stand Pavajon 3, T55-S56 a da spassi tuti ij di a un programa ch'a va sota ‘l tìtol «Parole di Piemonte». A s'ancamin-a giòbia 14, a 6 ore con na ciaciarada antorn a la neuva Lege Regional për la Lenga piemontèisa e j'àutre minoranse, con Sergio Gilardino, Rita Marchiori e Anna Maria Morello, e con ël consert dla Camerata Corale La Grangia; vënner 15, a 6 ore, për la lenga piemontèisa, ancontr con ël poeta Tavo Burat, presentà da Albina Malerba e Giovanni Tesio, leture 'd Fulvia Roggero; e consert «Evoa!» con la cita orchestra d'Enzo Vacca; saba 16, a l'istessa ora, a toca al francoprovenzale, con j'ùltime edission e l'euvra dël poeta Luigi Vayr, e con cant e baj an costum dle Valade; duminica 17, ancor a 6 ore, ij Walser, con Pier Giorgio Vasina, e grup an costum; lùn-es 18, midema ora, j'Occitan, con la Chambra d'oc e ‘l grup musical Aire dë prima. E sempre ant lë Stand dël Consèj Regional, tute le sèire, a parte da 8 e mesa, letura-spetàcol, «Premio për un testo teatrale nelle lingue dël Piemonte», presentassion e leture dai test premià o segnalà ant le prime 13 edission dël Premi, con j'ator dël Teatro Zeta e ‘l coordinament dël regista Pier Giorgio Gili. Ma ant la granda festa dij liber an tute le lenghe grande o cite, i segnaloma, ciamand sùbit përdon për le dësmentie, j'editor ch'a pùblico ëd lìber an piemontèis: Viglongo, Centro Studi Piemontesi, Artistica Editrice, Neos Edizioni, Graphot, Alzani, Daniela Piazza, Priuli & Verlucca, Il Punto, Interlinea... a son mach ëd sitassion; d'àutri editor a venta andeje a susné për le viassòle dla Fera. E peui da 6 ore dla sèira fin-a a quand la Fera a tira giù j'ante, randevò al T55-S56 për «Parole di Piemonte». d'Albina Malerba - dal Vënner ëd La Stampa dl'8 ëd magg dël 2009

Indietro