Edoardo Ignazio Calvo a Cinsan

Chi as trovèissa a passé a Turin an contrà Prinsi Amedeo, vardand an su al nùmer 41, a podrà vëdde na lapide, fàita buté da la Ca dë Studi Piemontèis, për arcordé che an cola ca a l’é na ‘l 13 d'otober dël 1773, ‘l poeta, scritor, médich piemontèis Edoardo Ignazio Calvo, ch'a l'ha pijà part e a l'ha cantà le gòj, ij seugn, ij magon ëd nòstr Piemont ant j'ani tra rivolussion giacobin-a e restaurassion napoleònica. Coma médich ël Calvo a esercitava al San Gioann e pròpi për ël tifo ciapà curand ij sò malavi a muirìa ‘l 29 d'avril dël 1804, quant a l'avìa mach trant'agn. Se coma médich a l'ha un pòst nen secondari e sò nòm a peul sté dacant a col ëd Michele Buniva, a l’é për soa euvra poetica che Calvo a l’é ricordà e studià. «Poeta essenzialmente civile - a scriv Renzo Gandolfo - la sua poesia è espressione di sentimenti vissuti e sofferti da uno spirito retto che si ribella alle prepotenze ed alle ingiustizie, siano di ceti privilegiati, come era nel vecchio regime, siano di oppressori forti soltanto per la fortuna delle armi». Giacobin, a l'ha scrivù ‘l «Sairà dij piemontèis», ma quand ch'a l'ha vist che «Liberté fraternité égalité...ij fransèis an caròssa e ij piemontèis a pé», a l'ha lassane soa euvra pi àuta con le 12 Fàule Moraj, ëd na fòrta satira antifransèisa, dasend vos a cola idea 'd nassion piemontèisa, con n'espression poetica ch'a supera ij temp curt dj' aveniment e dij sentiment individuaj an dasendje un valor ch'a dura për sempe. Ocasion për arnové l’arcòrd d'Edoardo Ignazio Calvo an ven da la Comun-a 'd Cinsan e da la local Biblioteca Civica «Nietta Aprà» che duminica 24 'd magg a parte da 10 e mesa dla matin ant la Sala dël Consèj a deurb n'esposission con document da l'Archivi Comunal «Cinzano, i Calvo e il loro tempo», seguì da n'ancontr su la vita e l'euvra dël Calvo, soagnà da chi a scriv costa nòta, con Roberto Viarisio e Davide Alaimo, e leture dle poesie dël Calvo da part d'Antonino Cavaletto. Vers mes bòt, an via Roma, a sarà inaugurà na lapide sla Ca un temp dla Famija Calvo, che a Cinsan a passava j'istà, e dova Edoard, motobin probabilment, a l'ha scrivù un-a dle soe ciadeuvre «L'ode su la vita 'd campagna». Ciamé anformassion sla manifestassion al n. 011/960.81.23. d'Albina Malerba - dal Vënner ëd La Stampa dël 22 ëd magg dël 2009

Indietro