Arcordand Pare Gasca Queirazza

A l'ha salutane parèj, con sò ùltim cadò filològich sël «Cerea», publicà sël nùmer dl'arvista «Studi Piemontesi» (1, XXXVIII, 2009). Ël salut ëd Padre Giuliano Gsca Queirazza S.J. (30 dë dzèmber 1922-21 luj 2009), professor Emérit dl'Università 'd Turin, a l'arvista, a la Ca dë Studi Piemontèis doa a l'era Vice President e President dël Comitato Scientìfich, con la sapiensa e la discression ch'a l'han marcà tuta soa vita dë studios e d'òm ëd Cesa. Gesuita, Superior dla Comunità dij Santi Martiri 'd Turin e Retor dla Cesa, Giuliano Gasca Queirazza a l'é stàit un djë studios ant ël camp dla filologìa romansa e dla lenga piemontèisa pi avosà a livel antërnassional. Sempe con umiltà, a l'ha butà sò savèj, ij frut dj'arserche an le biblioteche e j'archivi 'd mes mond a servisse 'd tuti, a servisse dël Piemont e dij piemontèis, sensa blaga, sensa mai vorèj monté an scran. Che 'd vòte ant na discussion a propòsit d'etimologìa o 'd toponomastica i soma trovasse a ripete «Venta ciamejlo a Pare Gasca!». Për generassion dë student, prima a l'Università gròssa, peui an costi ani për ij Cors ëd piemontèis dla Region e dla Ca dë Studi Piemontèis ant tut ël Piemont, e a l'Università dla Tersa Età, e tuti ij màrtes ant la sede dla Ca dë Studi an via Revel, e le lession a Roma për l'Associassion dij Piemontèis, e an Argentin-a e Brasile për coj piemontèis lontan, ma tant davsin al cheur, ël professor Gasca (Pare Gasca coma tuti lo ciamavo con afession) a l'é stàit un magìster ëd «paròle», dë studi, 'd vita, guida 'd sapiensa e d'umanità. An mancheran soa dutrin-a, ij sò consèj, !a fòrsa pasia 'd sò savèj. An resta 'l patrimòni dij sò studi (na bibliografia s-ciassa e pressiosa, ch'a venta goerné ch'as dësperda nen!), ij valor da ten-e avisch, 'l travaj da porté anans. Mentre 'l 21 d'agost a Còrdoba, Argentin-a, l'Università a l'ha già selebrane l'arcòrd e na mëssa ant la pi veja cesa gesuitica, a Turin i stoma organisand la comemorassion, e a l'é già programà për ël 25 dë stèmber, a 7 ore dla sèira, la Messa 'd trigesima ai Santi Martiri (an via Garibaldi 25), e l'istess di a la midema ora, për na grassiosa combinassion, 'dcò ij Piemontèis a Roma a l'arcorderan con na Mëssa ant la Cesa dël Gesù. Ansema për dije «Grassie Pare Gasca». d'Albina Malerba - dal Vënner ëd La Stampa dl'11 dë stèmber dël 2009

Indietro