Ël Vej Piemont ant ël neuv mond

Mendoza, Colonia Cello, Ramos Mejía, Rio Cuarto, Leones, Salta, Balnearia, VIllegas, Santa Fé, Ataliva. Opurament Córdoba o San Francisco 'd Córdoba, coma testimonia ‘l bel lìber, «Il Vecchio Piemonte nel Nuovo Mondo», cudì da Alda Rossebastiano për le edission «dell'Orso» 'd Lissandria (tel.: 0131-252349, pp. 274, euro 25). Quatòrdes studios ëd tute sòrt (da Alfredo J. Tonda a Adriana Barbano Raineri, da Daniela Cacia e Caterina Imarisio Simonetta a Cristiano Giorda, da Elena Papa a Amerigo Vigliermo e sò «Coro Bajolese», da Albina Malerba a Giuliano Gasca Queirazza, da Alberto Lupano a Anna Ferrari) ch'an conto ‘l Master ëd Coltura e patrimòni stòrich e lenghìstich dël Piemont organisà da la Facoltà de Siense dla Formassion dl'Università 'd Turin e sostnù da la Region Piemont, tnusse për doi agn a Córdoba e a San Francisco 'd Córdoba. Un cadò dë siensa e d'esperiensa che ij nòsti studios a l'han portà an Argentin-a ma ch'a l'han ëdcò arseivù da l'Argentin-a: la «Merica» për la pi part ëd j'emigrant piemontèis. Famie 'ntreghe (giusta j'Alberione, j'Appendino, ij Balbiano, ij Camussone, ij Daniele, ij Ferrero, ij Maero, ij Pautasso, ij Platini, ij Porporato, ij Racca ch'a son peuj mach cheidun dij tanti 'd Colonia Fidela ch'a l'ha studià la Rossebastiano), le «cadenas de Hamadas» come l'ha ciamaje Fernando Devoto. L'Argentin-a che a caval tra Eut e Neuvsent (ma nen mach) a l’é staita 'n «seugn» o 'n «sueno» 'd redension, l'ideja dla Pampa gringa, dla tèra ampromëssa. Përson-e an serca 'd travaj pi che 'd fortun-a, përson-e ch'as pòrto daré soe costume: 'l vin, le bóce, le paròle dle parlade plemontèise. Tute còse ch'a seurto sì da studi ancreus (ma 'dcò da tante emossion, coma ant ël «diario» d'Albina Malerba, o da cole di Caterina Imarisio Simonetta e Cristiano Giorda, ch'a parlo nen për gnente 'd «geografie emossionaj»). Còse d'un lìber special ch'a combin-a savèj e sentiment. ëd Giovanni Tesio - dal Vënner ëd La Stampa dël 18 dë stèmber dël 2009

Indietro