Studi Piemontesi – II – 2009

A l’é surtìe «Studi Piemontesi», l’arvista dla Ca dë Studi Piemontèis ch'a completa ij sò tranteut agn ëd vita con ël second nùmer dël 2009. Con soe bele pagine da tajé, nùmer - come sempe - rich e divers. Argoment dë stòria, d'arte, 'd literatura, studi, nòte, ritrat, arcòrd, inédit, recension segnalassion, un notissiari dle tante inissiative pijà da la Ca dë Studi, ma 'dcò da tante d'àute associassion o famije o grup o përson-e ch'a travajo an nòsta region. N'arvista bin conossùa, ma ch'a sarìa bel che tuj a conossèisso përchè - giontoma 'dcò sòn - daré a-i é n'anima ch'a la possa e ch'a la buta minca ses mèis a l'onor dël mond (ël diretor a l’é Luciano Tamburini, a deje d'agiut Albina Malerba e Giulia Pennaroli con la colaborassion d'un fiamengh grup dë studios 'd diverse materie: ùltim intrà ant ël «Comitato scientifico», Pier Massimo Prosio e Alda Rossebastiano). Cost nùmer as deurb con l'arcòrd d'Alda Rossebastiano 'd «Giuliano Gasca Queirazza» e la bibliografìa 'd tuti ij sò travaj; e peui: Alessia Casarotti an parla dle prime iscrission volgar an Piemont (Vërsèj e Casal Monfrà), Gian Savino Pene Vidari 'd n'euvra 'd Massimo d'Azeglio, Walter Canavesio 'd Carlo Finelli e dle sculture dla Gran Madre. E peuj Cazzola, Prosio, Claudio Gallo e Giuseppe Bonomi, Luca Pier Giorgio Isella, Cecilia Castiglioni, Luca Morosi, Concetto del Popolo, Carlo Caramellino, Stefano Baldi, Piero Condolo della Riva: ch'an parlo 'd dë Amicis gropà a na pelìcola con Majakovskij, dla «Bohème italiana» (ambelessì as trata 'd Salgari), dla «bastita» 'd Turin (sì as trata dij Capussin prima dij Capussin), 'd serti document a propòsit ëd Michelangelo Garove, ingegné dël Duca, 'd Bernardo Vittone e Mario Quartini, 'd doi quàder dla Sindone, 'd na pala 'd Felice Cervetto a Cavagneul, d'Angelo Sperati, musicista dël prim Eutsent, e dël Piemont figurà ant jj piat. Ma a l’é nen prò. E antlora 'ntoca gionté Giulia Baselica ch'an parla d'Angiolina Bosio, sopran turinèis mòrta an Russia, Georges Saro ch'a pùblica na litra inèdita 'd Cavour (17 fërvè dël 1856), Aldo A. Mola ch'a parla 'd Giolitti ant j'«otia» 'd Cavour, Alberto Stefano Massaia ch'a conta 'd via Pietro Micca e 'd via Roma. E peuj, come sempe, le tante recension, le tantissime segnalassion d'atività, d'ancontr, ëd moment ëd coltura an Piemont. Gnente mej che lese e toché con j'euj. Chi a l'abia intension d'abonesse, basta fé na telefonà e anformesse a la Ca dë Studi (011/53.74.86). Pòrte duverte. ëd Giovanni Tesio - dal Vënner ëd La Stampa dij 5 ëd fërvé dël 2010

Indietro