«L’Elisir d'Amor» an piemontèis

Massimo Scaglione, regista e studios ëd teatro piemontèis, a torna (ma a l'ha mai chità), a fene un bel cadò, e a pòrta an sena, al Teatro 'd Casal, saba 6 ëd mars, a eut e mesa 'd seira, «L’Elisir d'Amor», ‘l famos melodrama buf ant doi at 'd Felice Romani, con la mùsica 'd Gaetano Donizetti. La notissia a sarìa nen ëd cole da buté ambelessi, s'a fussa nen për ël fatto che cola che Massimo Scaglione a rapresenta a l’é la version an lenga piemontèisa, nen na version fàita adess, ma fàita dël 1859 da Anacleto Como d'Alba. Ël test, ridot e tradot, a l'era stàit publicà da la Stamperìa Savojardo dl'istess ani. Ma chi a l'era Anacleto Como? Le notissie a son stàite trovà e publicà da Simonetta Satragni Petruzzi, che dël 1998 për le edission dell'Orso 'd Lissandria, a l'avìa ripublicà 1 librèt, con na bela introdussion. Anacleto Como (1818-1892), a l'era n'avocat d'Alba, e a scrivìa an piemontèis për diversi giornaj umorìstich, con lë stranòm Fra Anaclet. L'euvra an piemontèis a l'era stàita rapresentà la prima vòta al Teatro Rossini 'd Tuplicà 'n bordel ëd sèire, segn che l'idea a l'era piasùa. La Satragni an soa antrodussion as ciama coma maj tra tante euvre liriche Fra Anaclet a l'avijssa sernù pròpe l'«Elisir» dël Donizzetti, e a propon tre motiv : a... la grande popolarità di Donizzetti a Torino e il fatto che "L'elisir d'amore" in particolare era stato messo in scena un gran numero di volte; il fatto che Romani fosse ormai un personaggio piemontese, essendo stato invitato da Carlo Alberto a dirigere la Gazzetta Ufficiale del Regno fin dal 1834; l'ambientazione agreste della vicenda che da un "villaggio dël paese de' Baschi" poteva essere trasferita in un paese dël Piemonte ». Coma ch'a sio andàite le ròbe a l’é bel che adess, dòp 150 ani la Companìa Tamagno a torna a porté cost'euvra a l'atension dël pùblich, con la diression ëd Claudio Morbo, la regia 'd Massimo Scaglione, l'agiut ëd Franco Prunotto, j'ator M. Cristina Berardo, Cristian Di Gregorio, Evans Tonon, Ugo Bonafede, Lea Lamarca, ‘l Còro dl'Associassion Tamagno (maestro Roberto Galfione), l'Orchestra Lirico Sinfonica dla Provincia 'd Lecco. Coma l'oma dit prima esecussion ant l'antica e còlta Casal Monfrà (anformassion: 0142/44.43.14). Ma dabon i s'auguroma che dòp a ven-a 'dcò a Turin. Antant i podoma tasté ‘l test con costa cita citassion da la sena prima dl'At prim: «Che piasì për col ch'a mssona/ Quand a l’é pi caud ‘l sol/ sota a mor o ai pé 'd na rol/ Pié un pò 'd fresch e respiré.../». d'Albina Malerba - dal Vënner ëd La Stampa dij 5 ëd mars dël 2010

Indietro